PYD INKHAWM NEIH TAN LEH A NI

 22nd March, 2021 (Thawhtanni Zan)

Zanin khan Local PYD te chuan kumin 2021 chhung atana Department inkhawm hmasa ber an nei. Kum 2020 March ni 22 atangin Covid19 avanga PYD Inkhawm neih theih a nih loh vang vang hnuah a kumkhatna chamah chiah PYD Inkhawm neih leh a ni.

Sorkar ruahmannain Karkhatah Zan hnih inkhawm a phalsak anga Local Churchboard rorel chuan Kohhranpuiin zan 2 hmang lovin Zankhat hi PYD Inkhawm hun atan a ruahman a, chumi bawhzui chuan zanin atangin Local PYD Inkhawm neih leh tan a ni. 

Zanin Inkhawmah hian kumin atanga membership fee-pe ve tan (Member thar hlak)te lawmluhna hun hman a ni a, Bro. Lalliansanga Ralte, Vice President-in inkhawm kaihruaiin Bro. Lalhruaizela'n hun hmasa a hmang a. Upa PC Lalthangdela, Bial PYD Secretary-in member tharte lawmlutin thu a sawi.

Hun hmangtu hian PYD member thar te chu hruaitute ṭha taka thawhpuitu leh PYD tan ṭhahnemngai taka thawk ṭheuh turin a chah a ni.

Hun hmangtu hian Thufingte 13:17, 'Zualko suaksual chu thil sualah a tlu lut ṭhin a, Palai rinawm chu damna a ni,' tih thu hmangin PYD te fuuhna thu ṭha tak tak a sawi a ni.

Thusawi tlangpui te:

* Krista tana sengkhawm hna thawk tur hian ṭhalai te hi Palai rinawm kan nih a ngai a.

* Krista tana sengkhawm hna thawk tura krista thuam in bel tawh te kan ni a, chu chuan rinawmna a kengtel tlat a ni. 

* Thuthlung rawngbawltu ni tur chuan miten tlan pah pawha an chhiar theih tur nun kan neih a ngai a, mite entawn tlak nun kan nei tur a ni.

Kan rawngbawltu hian thlarau thianghlim pawimawh zia sawi lang telin; tui baptisma chan ringawt hian chhandam a nih theih loh a, chhandam ni tur chuan Tui leh Thlarauah kan pian ngei ngei a ngai a ni a ti a. Hmanlai ang khan thlarau thianghlim hi awlsam taka dawn theih a ni tawh lova, thlarau thianghlim baptisma chang tur chuan tihtakzet a dil a ngai tawh a, chumi tur chuan keimahni pawhin theih tawp kan chhuah a ngai a ni a ti.

''Miten PYD te hi Krista rawngbawltu leh Pathian thuruk enkawltu hmuha min hmuh theih nan taima tak leh rinawm takin Krista rawng i bawl zel ang u,'' tiin kalkhawm te a sawm a ni.

Kumin (2021) hian PYD membership fee pe zawng zawng hi mi 86 an ni a, membership fee pe thar mi 8 awmin mi 4 an rawn inkhawm thei a ni. Inkhawm zawng zawng hi mi 32 niin thawhlawm hi ₹ 350 a ni.

Inkhawm banah hian Member tharte lawmna pualin ei leh in buatsaih a ni a, heng ei leh inte hi Local PYD sum atanga buatsaih a ni.

Thudang a awm leh hma chuan Thawhtanni zan apiangin PYD Inkhawm hi neih a ni tawh dawn a, PYD member ten ngaihpawimawh nise a tha awm e.

SOUTH CHHIMLUANG TLAWH

 S. Chhimluang tlawh

Dt. 14.3.2021

Kolasib Venglai Bial

Vawiin khan Tumpui Local UPC te chuan 2021 Bial Inkhawmpui rorel tihlawhtlingin S. Chhimluang Home Missions Field an tlawh a, member 30 an kal a, hemi atan hian Two Wheeler 4, Pikup 1 leh Gypsy 1 hman a ni.

Chawhma Inkhawmah T. Upa C. Lalmuanawma'n hun hmasa a hmang a. Marka 16:15 chhiarin Chhandamna hi Pathian ta a ni a, a chhandam turte hi Chhandam tlaka kan awm a ngai a chumi tur chuan Tui leh Thlarauva kan lian a ngai a ni a ti. Upa R. Biakthanga'n hun hnuhnung a hmang a. Rom 12:10 leh Phil. 3:16 hmangin Pathian thuchah a sawi a. Kan rawngbawlpuite hi Chawimawi kawngah kan induhsak a ngai a, an chhiatna aiin an ṭhatna kan zawngin kan sawi fo ṭhin tur a ni a ti a. Rawngbawlna kawng hrang hrang leh chanvo/mawhphurhna kan hlen kawngah pawh hmasawn kan ngai a, hmasawn tura ṭan kan lak zel a ṭul a ni a ti.

Chawhnu Inkhawmah T. Upa Lalmawizuala'n hun hmasa a hmang a. Hebrai 13:14 chhiarin he lei hi kan Khualzinna mai a ni a, chu chu kan hriat loh chuan kan thla a muang sual ang a, kuta sak loh chunglam ami hi chan loh phah ang tih a hlauhawm a ni a ti. Evan. Lalrelkima Renthleiin hun hnuhnung hmangin  Johana 14:26,27 leh 2Korinth 5:1,2 chhiarin Thlamuanna hian nun a tihahdam ṭhin a, ralthuam ṭha leh in leh lo leh bungraw ṭhate hian thlamuanna min pe thei lova, kan thlamuanna ber chu Isua Krista a ni a. Vana Kuta sak loh in nghet kan nei tih hi kan hriat a ngai a, chu hmun chang thei tura Thuthlunga koh kan ni a, chu chu kan thlamuanna atan a tling tawk em em a ni a ti.

Ṭumpui Local UPC te hian S. Chhimluang Missions Field tan Ketli leh Dekchi an pe a ni.