KAN PATHIAN BIAK DAN HI
Unaupa Lalrinchhana, C Th.
2 Korinth 3:17 Tin, Lalpa chu Thlarau chu a ni a; Lalpa Thlarau awmna apiangah chuan zalenna a awm thin.
Pentecost mite hi ruah hmasa, AD 30-a Jerusalema Thlarau Thianghlimin a din Kohhran hnung zui ni tura kum 1901 ruah hnuhnung (Thlarau Thianghlim) hmanga America ram Topeka, Kansas atanga din kal zel te kan ni a. Mizoramah erawh kum 1950 atang chauhin kan ding thung.
Mizoramah hian Kristianna hrim hrim hi chu a lo luhna hi a rei ve ta ngar ngar hle mai. 1891 ah Rev. Williams Williams a lo lutin, chumi a\ang chuan thingbul lungbul be thin kha Kristian lo ni chho ve in, kum 1901 ah phei chuan harhna hmasa ber kum 1930 bawr vel khan a thleng der tawh a ni. Chung harhna chu Mizoram chhim leh hmar a Presbyterian leh Baptist kohhrante chuan pawm thei lovin, harhna changtute leh dawngtute chu hnawhchhuah an lo ni ta hial a. Tichuan, Pentecost Kohhran zawmin Pathian hruainain vawiin ni hi kan lo thleng ta a ni.
Thlarau harhna dik tak atanga din, ruah hnuhnung vanga UPC Kohhran hi din chu kan ni teh meuh mai a, mahse tisa ram taka ngaihtuah chuan heng pawlte atanga peng chhuak kan nih miau avang hian, an Pathian biak dan leh tihdan thil tam tak hi vawiin thleng hian nghet takin kan la chhawm chho zel a. Hlabu ena khawng taka dinga, khuang pakhat chauh nena, "Aw Lalpa i malsawmna hlu," tia urhsun leh khunkhan taka Pathian fak thin tute an nih miau avangin, anmahni atanga Pathian Thlarau harhna hmanga lakchhuah ni mah ila, an kalphung tam tak vawiin ni thleng hian kan la chhawm chho ve zel a ni ti ila kan sawi suai tam lo vang. Amaherawhchu, Thlarau Kohhran kan nihna avang hian tlem chuan kan danglam ta deuh a. Thlarau pawh a zalen a, Thlarau mite pawh kan zalen a, khuang khata zai duhtawk lo vin, khuang hnih nente kan lo zai ta a, a nuam hle mai. Heti chung pawh hian urhsun lutukna leh khunkhan leh lutukna, kan ze hmasa erawh chu kan la sahuai thing vawn tlat zel tho zawng chu a nih hi maw.. Chu chuan Pathian chibai buk danah tihtakzetna leh rilru inhawng hawka Pathian biak ngam tak tak lohna min la neih tir zelin, Thlarau avanga zalen deuh si, tih tak tak ngam lohna leh rilru inhawn tak tak ngam lohna kan la nei ta zel chu a nih hi. Kan thinlunga Pathian hnathawh leh keimahnia lawmna leh hlimna lo thleng \hinte pawh, thinlung inhawng tak leh tihtakzeta Pathian hnena lawmthu sawite leh tihtakzetna thleng phak tak taka lam ngam lohna min neih tir tih hi a chiang viau mai. Thlarauva din, ruah hnuhnungin a a hrin Kohhran ni si hian, kan Foreign lam unaute mai pawh a ni lo, North East India chhunga kan unau, Zoram pawn lama kan rawngbawlpuite pawh hi tihtakzeta Pathian biakna leh fakna ah hian kan pha lo hle a ni. Tunlaiah thiamna a san tak em avangin khawilai ami pawh ni se, an nunphung leh khawsak dante, an Pathian biak dante, an rawngbawlnate pawh kan smartphone a\ang te, TV atangtein awlsam takin kan en thei vek tawh a. Chumi atanga ka thil hmuhchhuah ni ta chu, tih tak takna, zalen tak chung si leh theihpatawpa Pathian fakna kawngah hian Mizote hi kan lo hniam hle a ni tih hi a ni. A bikin foreign lama kan rawngbawlpuite ngei pawh hi kan va pha lo teh lul em! An inkhawmte hi a zângkhai em em a, an ti tak tak a, an zuang a, an tap a, an ban an phar a, naupang chhia anga kan ngaih; heng laia kan hlim san mai mai thin rual lekte thleng hian a tê ber atanga a lian ber thlengin an ti tak tak vek thin nia mawle! Tlar hnung bera thu paw’n, “Ka thutna a hla e mai, a tih ve tak tak theih loh,” an ti ve ngai lo va, a hnung ber leh a hmasa bera thute pawh an Pathian biak danah an tih tak tak dan a inchen reng tho nia! Naupangte pawh harh rual lek lek tur awm têtê-te pawh an ti takin an bei ve nasa thei em em mai a, eng vang nge heti taka naupang hawi mai mai rualte pawh theihpatawp leh tihtakzeta Pathian fakna chang an hriat kan tih chuan, an entawn tur puitlingten tihtakzetna leh zalenna hmang thiam tak si-a Pathian chibai an buk thin vang niin a lang.
Vawiinah hian kan Pathian chibai buk dan hi han en ta ila, Johana 4:23-24 ah chuan, Pathian chibai buktuten thlarau leh tihtakzeta Pathian chibai an buk thu leh, chutianga tihtakzeta Pathian chibai buktute chu Pathianin a zawn thu kan hmu a. Chuvangin, tun huna kan inkhawm changa Pathian kan fak dante, chibai kan buk dante han en hian, thlarau leh tihtakzeta Pathian chibai bukna Johana ziak ami hi kan thleng pha ve kher ang em? tih hi ngaihtuah tham tak a ni. Biakinah Bible zakzehin uluk tak leh nalh takin kan kal khawma, kan zai a, nungchang tha takin kan thu a, kan hla thiamsa sa chungin kan zai ve mai a. Tan a lo huna, ding chungin hla kan sa a, sipai pension vek ang mai hian a tam zawk hi chu kan ding khawng ngil thei viau mai a. Tlema ti tak tak ve deuhte an insawi lêt lêt a, a rau leh a ti tak tak ber te an lamchhuak a, chungte chu a tam zawk pawh a kala kal kualte an ni tlangpui. Hei tak hi a ni ka sawi duh chu. Keimahnia Pathian Thlarau hnathawh a lo thlena, min rawn sawi tak tak a nih loh hi chuan kan Pathian biak danah hian han lam tak tak \hin hi chu mi pahnih khat bak an ni ngai meuh lo.
2 Korinth 3:17 ah chuan Pathian Thlarau awmna apiangah zalenna a awm thin, tih kan hmu a. Thlarauva din Kohhran ni si hian kan zalen tlat lo va, min phuartu a la awm tlat avangin zalen tak hian Pathian kan la fak ngam lo niin a lang. Fak hla in, "I bân pharin Lalpa fak la, hnehna i chan theih na’n," a tih hi a dik hle a, bân phar chunga Pathian fak te hi a ho lo viau a nia aw.. Kan zingah hian bân phara Pathian fak thin mi engzat nge awm thin le? Bân phar lo paw’n Pathian a fak theih tih hi kan hnialna a ni maithei a, mahse bân phara Pathian faktu leh khawng taka Pathian faktute hi Thlarau lamah an thlen chin a in ang lo viau ang tih hi ka sawi ngam a ni. Vawiina tihtakzetna nena Pathian fak ngamlo zawng zawngtute hian kan inkhawmnaah hian zalen tak leh tih tak takna nen Pathian han fakin han chawimawi ta vek ila, bânte pharin, a \henin kut beng chung ten han zuang ta se la, tun aia nasa hian kan hnenah hian Thlarau hnathawh hi a lo thleng nasa ngawt hian ka ring a ni. Ngati nge heti tak mai a Thlarau Thianghlim Baptisma te hi kan in dilpuia, dawn a harsat tak em em mai tak le, tih te hi heng a\angte hian a langfiah ta uar hian ka hria. Thlarau lam hlapui te pawh inlungrual tak leh tih tak takna nen hian Pathian chibai buk tlâng vek ila chu, boruak sak leh dil ngawih ngawih ngaite, boruak heng lutukte hi a awm ngai lovang tih hi a chiang khawp mai. Thlarau awmna Kohhran nia inchhâl si, kan zalen lo lutukte, tih tak takna leh theihpatawpa Pathian faka chawimawi tak tak tumna kan nei lo lutukte hian Pentecost ni-a Kohhran ding kha kan chhun pha lova hriatna ka nei thin a ni.
Hemi bakah hian, khawvel Pentecost Kohhran zinga Thlarau hnathawh dawnsawn dan leh a lo awihna hmanrua Pathianin a pekte chu Mizorama UPC Kohhrante chauh hi kan ni tih hi ka sawi sual ka ring lo. Zai ramte, hlapuite, Beramno chawina hlate, pawih zaite, tuikuk zai leh vai zaite thlengin min pe, hemi kawngah pawh hian kan fimkhur a ngai ta hle mai. Duh aiin thalaite kan hmanhmawhin a tul lo ram kan hrut ta mah mah thin niin ka hria.
Thlarau lamah experience chu ka nei bik lo, mahse kum 72 chuang Thlarau hnathawh hi UPC-te hian kan lo dawngsawng ve tawh a, Thlarau zia leh a lo awih dan ram hi chu eng emaw chen chu hre ve tawh tur kan ni. In lungrual taka hlapui sa mai tur hian, a ki rawn kal pawh ni lem lo, huau huau leh sahawk chakna thalaite rilru mil zawngin kan kuai her ta thut thina. Kan SI SAW SA ta vak vak mai thin a. Hlapuia hlim taka lo lam ve kerh kerh thin kan upa hote leh nu leh pa te hi a ngaihna hre lo vin an hul ta der thin tih hi kan hmuh hmaih thin.
Australia a kan rawngbawltu pakhat chuan, NEI UPC-te hian, Thlarau Baptisma dawnna khawp tak tak in pawh pha lo, sahawkna leh zauthauna (Emotional) ah in thamral min ti a nih chu maw le. Chu chu vawiina kan mu tanna a ni chiah bawk a ni. Kan inkhawmna leh a nawlpuia Pathian kan fakna ah hian, rawng tharte, zai nêmte, pawih leh vai zai kan tihte hi kan lo mamawh vek lem lo tiin sawi ta ila, thenkhat chu kan ngaihdan a ni lo maithei, mahse a dik a ni. Mizorama UPC dinna hmasa ber, Thlarau lamah pawh keini aia tawn hriat ngah N. Lungleng Kohhrante sawn hlapui piah lam zai nem, rawng tharte hi an lo duh vak lem lo. Tin, Upa Zakamlova, Mizorama UPC tana sulsutu pawh khan zai nêmte hi Setana love song tiin a duh lo hle a ni. A chhan chu thlarau lamah sawngnawina leh puitlinlohna a thlen thin vang a ni. Mahse heng zai ram ki hrang hrang te hi mamawh lo tawp chu kan ni lo, chutih rualin a hman hun a awm vang zawk a ni. Thlarau lam hlapui lungrual takin kan sa ho ang, Beramno chawimawina kite nen, chuta la zo thei lote, inkhawm ti kal hlei thei lo khawpa la buaite leh inkhawm ban hnu lam thlenga Thlarau lam tulna ki nei, anmahni Thlarau lama subject zo thei lote zawhpuina tur atana zai ram thilpek dawngte sak tur zawk niin a lang. Hlapui rem laia kan duhna lai laia kan luh kual a, kan sahawk vak vak thin avang hian inkhawm hunbi leh program thlengin a buai phah nuai fo thin a ni. Thlarau Kohhran tih vanga buai nuai reng tur kan ni reng lo, Thlarau hi a buai ngai lo va, a dawngsawngtute hian a lo enkawl dan kan thiam loh thin avang hian kan buai zawk thin a ni tih hi ka sawi duh bawk a ni.
A tawp berah chuan tuna kan inkhawm dan te, kan hla sak hote hi ka sel lo, a tha lutuk. Mizo kan nih chhung chuan Pathian fak na’n leh Pathian biak na’n kan hmang zel dawn. Mahse tuna kan Pathian biak dan zulzui hian, a aia nasa leh uar zawk hian, sahawkna leh zauthauna satliah maia thamral lovin, tihtakzetna leh theihpatawpna nen, kan Pathian hi chibai i buk thin ang u.
Pathian chu Thlarau a ni; a chibai buktuten thlarau leh tihtakzetin chibai an buk tur a ni. Johana 4:24
