ZIRLAI PASS THAR LAWMPUINA HLAN
Dt. 12.06.2023 (Thawhṭanni Zan)
Zanin khan Ṭumpui Local PYD te chuan an member HSLC, HSSLC pass tharte leh Graduate tharte pualin hun an hmang a, heng pass tharte hi lawmpuina thuziak (tar mai theih) an thlalak chuanna an hlan.
He hun hi T. Upa Lalliansanga Ralte, President-in a kaihruai a, hetiang hun Local PYD ten kan hmang leh thei hi a lawmawm a ni a ti.
Hemi zan hun hmanpui tur hian Bial PYD Education Sub-Committee hruaitute sawm niin Sis. Lalrinchhani, Secretary chuan thutawi sawiin hlawhtling tur chuan chhel, taihmak, beih ngar ngar a ngai a ni tiin, mite pawhin an chhawr chak PYD member ni turin inkhawmte a fuih a ni.
Bro. Lalroenga'n hun hmasa hmangin Thufingte 14:23, Thufingte 10:4, Phil 3:16 a chhiar a. Zirnaah hian tawp tih a awm thei lova, pawimawh ber chu enge kan thawh tum/nih tum tihah hian chian em em a ngai a ni tiin, lehkha thiamloh a zahthlak lova, thawhchhuah neih loh erawh a zahthlak a ni tiin zirlai pass tharte leh inkhawmte fuih bawk.
T. Upa Eddie Zonunkima, Chairman, Bial PYD Education Sub-Committee-in thusawiin Tita 3:14, TT 17:26-28, Thuhriltute 12:11 a chhiar a. Zirlai kan nih rau rau chuan zirtam hrim hrim hi a pawimawh a. Mizo zia "zir tlem niha thiam tam nih tum" hi kalsan a hun tawh a ni a ti. Pass tur ni lova, mithiam ni tura lehkha zir tur leh dinhmun sang thei ang ber thlen tum hrim hrim turin kalkhawmte a fuih a.
Zir hian tawp chin a nei tur a ni lova, hna zawn kawngah pawh huaisen kan mamawh a. Hmalam hun hlauhna nen chuan hlawhtlin a har a ni tiin taihma taka zir a ngai a ni a ti.
Heng zawng zawng hi a thlawn a nih lohna tur chuan PIANTHAR a ngai a ni tiin kan nun, kan chet zawng zawng hi kan Pathian vang a ni tih hriat reng a ngai a, kan pianthar phawt chuan engang pawh tawng ila thuthlung hi kan zah pui ngai lovang tiin inkhawmte a fuih a ni.
Zirlai pass thar lawmpui hi mi 12 an ni a, anmahni pual hian inkhawm banah thingpui leh a hmeh tui tak buatsaih a ni.
