KOHHRANIN RAL

 Sis. LALKHUMI KOHHRANIN RAL
Dt. 29.07.2023 (Chawlhni Zing) 7:00AM

Dt. 23.07.2023-a mual liam ta SIs. Lalkhumi chu Kohhranin in inenkawlna kan neih angin tukin khan ral a ni a, ralna inkhawm hi a hun tawp a hmanna Sis. Lalramliani te Inah neih a ni.
Ralna inkhawm hi Bialtu Upa, Upa PC Lalthangdela'n a kaihruai a, hetiang hun hi hman chakawm tak nilo mahse kan hman a ngai thin a ni tiin Pathian rorelnaa thu kan neih loh zia a sawi.

1 Thes. 5:1-3 a chhiar a. Sis. Lalkhumi'n a chhungte pawh bel lova, Kohhran mite a bel zawk tlat hi mi tam tak ngaihdanah chuan atthlak a ni maithei a, mahse, Pathian Kohhran ho a ngainat em vang a ni a ti.

"Khawvel hi buaiin a khat a ni deuh ber tawh mai a. Sarthi leh ruang chharte pawh hian kan thin a tiphu phak tawh lo. Hetianga khawvel inlumlet vel karah hian Isua nghaktu; keini ho hi chu êng fa kan ni a. Thima awm kan nih lohzia hi lang fo sela, Isua lo kal hunah a êngin a tihèn theih tura nun kan lo hman a ngai a ni," a ti a. "Kan rin Isua a pangngai angin keini pawh hi hmalam pan zel tura kan inbuatsaih a ngai a ni" tiin ralna inkhawma kalte a fuih a ni.
Kohhranpui aiawhin Upa Lalchamliana, Treasurer-in ralna thilpek a hlan a, Local LAD aiawhin Sis. Lalremmawii, President-in ralna thilpek a hlan bawk a. Heng ralna thilpekte hi Sis. Lalramliani'n a dawng a ni.

ZUALKO

ZUALKO 

KAN THEN TAK Sis. VANLALCHHUANGI (KUM 61)

VUI HUNSERH

Thih ni : Dt. 27th July 2023 Dar 11:57 a.m

Vui hun : Dt. 28th July 2023 Dar 12:00 Noon

Chảirman : Rev. R. Lalnithanga

Tawngtaina : Upa R. Biakthanga

Chhungkaw aiawh thusawi : Pu Zomuana

Thlamuanna : Rev R. Lalnithanga

HIa hnuhnung : Aw Haleluiah Lalpa ropui ber

Thlanmnual : Upa PC Lalthangdela

A CHANCHIN TLANGPUI

Sis. Vanlalchhuangi hi Pu Zalawma (L) leh Pi Thansiami (L) te fa 4 zinga u ber niin kum 1962 Oct ni 2-ah Kolasib ah a lo piang a, a pianpui unau te chu :-

1. Vanlalchhuangi /o Zomuana Kolasib

2. Lalfakzuali w/o K. Vanlalmuana (L) Kolasib

3. Zoramthanga hlo Zokhumi Kolasib

4. Lalhlimpuii w/o Lalnunzira (L) Aizawl

Kum 1981 Sept ni 23 khan Zomuana nen UPC NEI Venglai Kohhranah Pastor Hrangvunga'n in neih tirin Fa 5 leh Tu 6 an nei a ni. A fate chu :-

1. Lalmuankimai

2. Jacob Zobuanga

3. Lallawmawmi

4. Elizabeth Zonunthari

5. Vanlalhriatpuii w/o Lalfakzuala Dutlang

A mah hi mi harh vang leh hlim thei thenrual ngaina tak mi a ni a, kohhran leh khawtlangah te a phak tawka in hmangin Electric vengin VC a neih hmasak ber kum 2015-2020 khan VC member a ni a. Khawtlang tana a theih tawka a thawh mek laiin kum 2017 May-ah a hnute-ah bawk hmuh chhuah a ni a, hmunpui lam panpui nin Cancer natna hmuhchhuah a ni a. Chemo te khaia rei tak in enkawl a nih hnuin a cancer chu a dam a.

Kum 2022 kum tir lam ațang khan Zunthlum leh BP sang te neiin a taksaah chak lohna chi hrang hrang ten a tlakbuak chho tan a, mi har vang tak leh tuarchhel tak mi a nih avangin chak lo chung chung pawhin thenrualte kawmin a in ti harh hram hram thin a ni.

A HUN HNUHNUNG

Dt 27.7.2023 (Ningani) zing khan a tupa nena an chhuak haw lam chu a luhai avangin scooty ațangin a tla a. District Hospital Kolasib Casualty panpui a niin biak theih lohin a awm nghal a, Doctor, Nurse leh  damdawiina thawktuten theih tawp an chhuah hnuin Aizaw lama refer a ni a Kal kawnga kan kal mek laiin Kawnpui daiah a thawk buai avangin Kawnpui damdawinah let pui leh ani a, Doctor, nurse leh damdawiina thawhten theih tawp chhuaha an buaipui hnuin, Aizawl lam panpui leh a ni a, Zanlawn daia kan tlan mek lain a rawn zual leh a, Zanlawn SC ah tlan luh puiin thawktuten theih tawp an chhuah hnuin Dar 11:57 a.m ah min kalsan ta ni.

ZUALKO

 ZUALKO

LALKHUMI (76)

1947 - 2023

Thihni : 23rd July 2023 (Chawlhni) 6:40 AM

Vui hun : 23rd July 2023 (Chawlhni) 2:00 PM

Vuitu : Rev. R.Lalnithanga

Chhungkaw aiawh : Upa Hv. Thuamliana

Thlanmual hun hmangtu : Upa R. V.L.Hmangaiha

Thlahna hla : Ni ropui alo thleng dawn ta (KHB. 351)

LALKHUMI CHANCHIN TLANGPUI

Sis. Lalkhumi hi Rochhuma (L) leh Vangpari (L) te inkarah ni 31/12/1947 khan Sesawng khuah a piang a. An unau hi pali (4) an ni a, chungte chu :-

1. Lalkhumi (Kan sun mek)

2. Lalkima, Thingsulthliah

3. Ngurnunsiami

4. Ngurchhingpuii, Mission Vengthlang, Aizawl

Zamawia Varte (L) nen innei in Thingsulthliah khuaah puanthui in ei an zawng thin a. Puanthui chawlhsanin san siam leh a. Engemaw chen Thingsulthliahah eizawnga an awm hnuin Kolasib ah sana siam in ei an rawn zawng leh a. Chumi hnu chuan Aizawl lamah pem chho leh in, Thingsulthliah lamah bawk an let chho leh a ni. Sana siam chhunzawm zelin an mit in a tlin tak loh avangin Tuikhurhlu ah eizawnna dang dapin an chhuk thla a, hetah an awm lai hian a pasal Zamawia Varte (L) chuan ni 30.01.1990 (Thawhlehni) khan a boral san a ni. Hemi hnu hian Kolasib lamah lo chhuk thla in, New Diakkawnah a nau Thuamliana te belin a awm thin a. Chumi hnuah chuan Tumpui lamah hian a thih ni thlengin a khawsa ta a ni.

KOHHRAN A RAWNGBAWLNA

Lalkhumi hi tawngtai mi, thlarau hmaruai nei a ni a, thuhril mi tak niin zing tawngtai inkhawm pawh a dam phawt chuan thulh duh ngai lo mi a ni. Pathian rawngbawl chak tlat mi a nih avangin Chawilung khuaah te, Saihapui hmunah te leh Suarhliap ah te missionary-in awm tawh a. Tumpui Kohhran a a lawi hnu pawh hian Local LAD-ah President te niin a theih ang tawkin rawngbawlna a chhunzawm zel a ni.

A NAT DAN TLANGPUI

Sis. Lalkhumi hi thisen sang nei a ni a. Dt. 10.04.2023 khan a chauh deuh avangin Nazareth Nursing Home, Tumpui-ah admit a ni. Ni 12.04.2023 ah District Hospital-ah sawn niin, a lu na a reh theih loh avangin Durtlang Hospital ah CT Scan tih a ni a,  a lu-ah bawk a awm tih hmuh chhuah a ni. ZMC lamah refer niin ni Dt. 02.05.2023 khan chhohpui a ni a, ZMC-ah MRI te tih anih hnuah a mit hrui inkarah bawk awm hmuhchhuah leh a ni a. Dt. 11.05.2023 ah Discharge niin, ama duhthlanna angin Kolasib lamah  hawpui a ni a. A nau Sis. Lalramliani (Seni) te in, Tumpuiah luhpui a ni a. An ni hian theih tawpin hmangaihna nena enkawlin Dt. 23.07.2023 dar 6:40 AM-ah chatuan ram min pan san ta a ni.

Bial chhunga Churchboard ho nen

Tumpui LAD-te nen

Bial LAD te nen

ZUALKO

 ZUALKO

Dt. 22.07.2023 (Inrinni)

UNAUPA MALSAWMTLUANGA KAN CHAN TA

Vawiin khan Unaupa C. Malsawmtluanga (Masena, a pa Bro. Lalhmangaiha chu nat lawk em em pawh awm lovin kan chan ta.

Unaupa C. Malsawmtluanga hi 30.08.1988 khan a piang a. A naupan lai pawhin tha taka SS kalin a phak ang tawkah a inhmang ve thin hle.

Kohhran chhinchhiahna bu-a a lan danin Dt. 20.4.2002-ah Evan. Vanlalhruaia Pachuau kutah Isua hminga Baptisma a chang a, thlarau pawhin nasa takin a pawl a. 2006 Krismas(?) vuakveta kan Local-a  thalai rual zinga nasa taka thlarau thianghlim a thlen tumte khan a hlim em em a, lamtualah pawh a tal nasa pawl a ni a.

Group PYD-ah hruaitute niin hma pawh a la chakin a thawk rim em em a. Thusawi mi a ni lova, a taka thawk chi a ni a. A theihna leh phak tawkah chuan a tlanchhe ngai lo. Tuna Kohhranin Keyboard kan hman mek hi Group PYD Leader a nih laia an lei niin Tumpui UPC/PYD-ten Keyboard kan neih hmasak ber a ni nghe nghe. Aia upate zahthiam em em niin Kohhran hnatlang leh thiltih nikhuate hian a mawng a zangin tirh nuam tak a ni.

Hringnunah hian a tha lam ringawt hian a daih seng lova. Unaupa Masena pawh hian chaklohna zawn a neih ve avangin a hun hnuhnung lamah hian Kohhranah a hmel kan hmu tam thei ta lo zawk a ni.

Vawiina a thiante nena an leng chhuak chu an kaiharh zo ta lova, damdawi in panpui niin vawiin tlai 2:50pm khan Kolasib District Hospital Casualty-ah min lo peih loh san ta a ni.

Lusun chhungte Lalpa'n thlamuanin awmpui zel rawh se.

2018-a Zawlnuam Bial lama rawngbawla an kalna thlalak hi amah thlah nan dah a ni e.