UNAUPA LALLIANKIMA RAL

UNAUPA LALLIANKIMA RAL
Dt. 31.03.2024
ṬUMPUI LOCAL UPC

Tukin dar 7 khan Dt. 22.3.2024 a boral Bro. Lalliankima aka Vala chu Kohhranin a ral.

Upa R. Biakthanga, Local Churchboard Chairman-in a kaihruai a. Pathian hnenah hun hman turte hlanin a ṭawngṭai.

 

Chhungkaw lam aiawhin Sis. Zohmingi (Unaupa Vala u) chuan thusawiin khawtlang leh Kohhran tan mi ṭhahnemlo an ni chunga hmangaihna leh lainatna an dawng nasa chu lawmawm a tih thu a sawi a, nasa taka ṭawngṭai pui an ngaih thu a sawi bawk.

Kaihruaitu hian thuchah sawiin Isaia 57:1 leh Sam 90:10 a chhiar a. Kan ràl mek, Unaupa Lalliankima hi a phak leh theih tawkah Kohhran tana inpe tak a ni tiin, thihna rau rauah pawh Nupa ṭang ṭhen hi a na bîk a, mihring tawn atan chuan thihna tluka rapthla hi a awm lova, theihnghilh mai pawh a har em em ṭhin a ti a. Chutihrualin, thihna chung changa thu kan neih loh zia a lang chiang em em ṭhin a, Pathiana innghat tlat tan lo chuan tawrh zawh a har ṭhin a ni a ti bawk. Khawvelah hian hlun tur kan nih loh avangin engtikah emaw kan hun a la inher chhuak ve dawn a, chutih hunah chuan chawlhna nuama chawl turin kan damlai ni kan chhiar thiam a ṭul hle a ni tiin, kan lusunna ata thochhuak a, Pathian lam kan hawi luih hram hram hian Pathian thlamuanna leh awmpuina kan dawng ṭhin a. Kan lusunna leh khawharnate lakkian a ni ṭhin a ni a ti.

Tukiina ralna inkhawmah hian Kohhran mite kal kan tha a. Kohhranpui aiawhin Upa Lalchamlina, Treasurer-in ralna thilpek a hlan a. PMD lam pawhin ral nghalin Bro. C.Vanlalmuana'n thilpek a hla a. Ralna thilpek hi Bro. Lalliankima nupui, Sis. Lalhriati'n a dawng a ni.

 

 

 

 

ZUALKO

 ZUALKO
Hming - Bro. Lalliankima
Pa hming - Bro. C. Sangliana
Thihni - Dt. 22.04.2024 @ 12:00AM
Natna - Thawhah
Vui Ni - Dt. 22.03.2024 @ 12:00Noon
Vuitu        - Evan. Lalrelkima Renthlei

Thlanmuala hun hmangtu - Upa R. Bikthanga, Bialtu Upa

Unaupa Lalliankima hi Sis. Lalhriati nen inneiin fa 2 (Hmeichhia 1 leh mipa 1) an nei a. Tuna an chenna hi anmahni inhmun a ni nghe nghe.

Amah hi mi taima tak, a chhungte tan pawha innghahna leh an rin em em a ni a, Thing leh Cement lam hna pawh a thawk kawp thei a, Biak In leh Kohhran Building tundin kawngah pawh a hmel hmuh tur a awm reng thin.

Kohhran hunpui hrang hrangah ruai buatsaih a nihin a tel lova ruai buatsaih hi a tam lo hle ti ila a sual awm love. Fatu nghet a ni thin a, tun hnaiah thalai lamten an ken tak deuh avangin a lang ngai vak ta lo zawk a ni.

A boral hma kar 3 velah khan a awmruh na a sawi tan a. Khuh kherh kherh neiin Doctor-te pawh an rawn a. X-ray te leh ECG te pawh tih niin a chuapah tui tlemte a tling tih hmuhchhuah a ni a. Ngaihthatlohna liantham pawh nei lovin Doctor thurawn angin damdawi hmangin an inenkawl chhunzawm a. Mahse, a khuh a zual a, a khuh a nat tak deuh avangin a hun tiam hamin Doctor rawn leh a ni a a. Damdawi Inah Isolation Word-ah admit niin a hnuah Male Ward-ah sawn leh a ni a. Dt. 21.03.2024 khan Ultra Sound-a endik a nih hnuah a pumpuiah thi tling a awm tih hmuhchhuah a ni a. Hemi zan dar 9 vel atang hian a thawhah zualin a buai chho leh zual a, zan dar 12-ah he khawvel hi a lo chhuah san ta a ni.

Kohhran te bakah anmahni buaipuitu YMA leh khawtlang hruaitute leh khawtlang mipuite hnenah a chhungten lawmthu an sawi.