TUMPUI UPC BIAK IN AS ON 22.12.2022

 

NILAI ZAN THUPUI BU 2023 BIH THUAKNA

 NILAI ZAN THUPUI BU 2023 BIH THUAKNA

Zorema Hlondo

Kum 2023 Nilai Zan Thupui Bu chu tihchhuah a ni ta a, a lawmawm hle mai.

Thupui Bu hi N. Mizoram District UPC-in a Publish niin copy 2500 siam a ni a, kan District chhunga member awm zat ngaihtuah chuan a tam lo hle mai a, hei hian lehkhabu lei kawngah Kohhran mite kan than harh a ngaih zia a tilang theiin ka hria. Copy 2500 tal hi chu kan lei zo thei turah ngai phawt ila. TM Offset Printing Press, Canteen Kual, Dawrpui ten an print a ni a, phek 227-a chhah a ni.

A kawm pawh kan Kohhran rawng nena inhmeh tak mai hman niin hmuh a hahdam hle mai a, a ràn dan pawh a mawi tawk viau.

2023-ah hian Thupui 42 zir tura ruahman niin heng thupuite hi mi 7-in an ziak a, a ngaihnawmin a hlawkthlak dawn.

Kan miril leh chhuanvawr; Evan. Lalchhuanmawia Sailo hian Tlanna leh Chandamna a ziak a, rinna kawnga kan inhnial thinna tam tak a tihkian bakah kan fiah phah hawk pawh a beisei awm. Hemi huangah hian Thupui hrang hrang 6 a awm a, TLANNA tih awmzia tawng bul lam atanga a rawn chhui chhoh dan leh a sawi fiah zui dante hi a bengvarthlakin a tuiawm asin aw...

Kan Pastor Senior zinga mi; Rev. HF Malsawma hian Ringtute mawhphurhna a ziak a. Ringtute mawhphurhna chungchanga ka chan loh khanah a rawn chhuak daih mai.

Kan mi senior; General thlenga chanvo pawimawh tak chelh a Kohhran min lo hruai tawh thintu, Rev. K. Darsailova'n Kristian Chhungkua a ziak a. Tawnhriat tha tak nei a nihna a lang leh a, Kristian chhungkua tawitea a hrilhfiah dante hi a va tawk tak.

Kan Pastor chawl ta; Rev. RC Puia'n Pentecost mite tih tur reng niawma mawi, Thlarau Thianghlim Humhalhna a ziak a. Engvanga Thlarau Thianghlim chu humhalh ngai nge a nih a rawn chhui chhuak nalh leh hle.

Pastor dam thluam mai; Pastor K. Ainawna hian amah ngeiin Pathian malsawmna a dawn a taka a hmanchhuah nena inhmeh em em mai, Pathian tihdamna a ziak a. Isua thiltihtheihna a taka hmuh ve ti chakawm rum rum thei khawpin a ziak chuak ropui nia!

Bial vawn kawng leh Kohhran Inkaihhruainaa mitha em em mai; Rev. C. Laltlanchhuaha hian Kohhran Inrelbawlna a ziak a. Hruaitu pawimawhna atanga bul tanin Kohhran member hrim hrimte mawhphurhna huam telin, tumah kal kan bik pawh nei lovin kan hmasawnna tur hrang hrang a rawn tarlang a. Agenda chung changa a thuziahte hi a tuiawm a nia....

Pastor zinga la thar lam mah nise, Pathian thu leh zirna kawnga mi duai lo Pastor F. Lalchhanhima hian Hun hnuhnung Chhinchhiahna a ziak a. Ka thupui tuipui lutuk loh a ni chungin han chhiar thlen meuh chuan tui loh a har tulh tulh mai a, tui loh luih hleihtheih pawh ni lo khawpin mitthlaa lang chuai chuai khawpa ka'n chhiar pek chu!

2023 Thupui Bu hrim hrim hi a lan dan leh a thu an chhut dan (Layout & Type settings) a fuh viau mai a, a phek number an dah dante hian a tilang changkang leh zual a. Tha ka tih deuh chu a phek dinglam zelah Thupui hlawm kengtu hming dah zel a ni a, Thupui tin hi 6-ah thendarh vek a nih avangin hei hian eng thupui hlawm ber nge kan zir tih a tichiang zel a, editing board te leh a bu buaipuitute an fak awm ngawt mai.

Hei bakah hian kum danga kan sawi tel thin; a hawrawp hi a sin lutuk ta lo bawk a. Tlema kum tam deuh; mit fiah vak lo tan pawh Tarmit nen chuan harsa lutuk lovin a chhiar theih a beisei awm.

A tir lama thu lawmtawi ho sawifiahna an dahte hian a ti Lehkhabu lehzualin ka hria a, tehfung lek dawn ta ila hei hian a vawrh dawrh theiin ka ring.

Duhkhawplohna tlem :

Hetiang Lehkhabu buaipui hi ka tlin ve hauh loh tur a ni nachungin duhkhawplohna te ka' lo nei ve khang lang a. A kawm hma lamah hian Kohhran hming chauh awm hi ka duhkhawp lo deuh a, kan Logo chuang tel atan ka lo it ve deuh hei chu.

Uluk taka endik a ni tih a hriat em em rualin hawrawp (Alphabet) hman dan inang lo awm hi inang tlang thei se mit a tihahdam leh zual angem aw ka ti... Entirnan; Kohhran tihah hian a thenah K hman a ni a, a thenah hian k hman a ni leh ang lawi a. K hi hmang vek se tihte ka lo ngaihtuah a.

Tin, a phek veilam zelah hian NILAI ZAN THUPUI - 2022 tih aiah a thupui thensawm hming hi dah zel se a fuh zawk angem aw tih ka ngaihtuah a, a fuh lo zawk maithei bawk a. A kawmah a Bu hming tak chu a awm tawh tho avangin heti zawng hian awm ta se zirtu tan pawh phek tinah khan Thupui thensawm hming kha keu let ngai lovin hriat zung zung a tih awlsam phah angem aw... Hriatna inchen lo tak tak kan ni ve hlawm sia.

Han sawiselna mai tur a vàn em avangin kan khawn chawp deuh mai mai a ni e

Taima takin, kim takin Thupui hi zir chhuak vek ila, sawiho tura an rawn dah chhuahte pawh kan duh lam hawi hawiin kan lei kan hawl kual ve leh ang a. A Bu tichhuaktuten Thuhmahruaia an ziah angin Kohhran hote hian hlawk takin zir theuh ang u.

CHURCH BOARD RUAT THAR

CHURCH BOARD RUAT THAR
TUMPUI LOCAL UPC
Dt. 11.12.2022 (Chawlhni Zan)

Zanin khan Rev. R. Lalnithanga, Bialtu Pastor chuan Local Church Board rawn siam tharin Upate leh T. Upa a rawn ruat thar.

Bialtu Pastor-in inkhawm kaihruaiin Kohhran Dan kan neih anga Tualchhung Kohhran hruaitu inruat thar hun a nih avanga hetiang hian kan hmang a ni a ti. Tirhkohte Thiltih 6:2-3 leh 1 Timothea 3:1-13 a chhiar a. Kohhran hruaitu chanvo hi chanvo pawimawh leh sâng tak a ni tih kan hriat a ngai a, kan nun leh chhungkuaa harsatna a lo thlen pawha chhel taka tuar chhuak thei kan nih a ngai a ni tiin, mawhphurhna hi Pathian thlir tlat chunga kan tihhlawhtlin a ngai a ni a ti.

Rawngbawltu pawimawh kan nih avangin thlir kan hlawh bik a, kan fimkhur a ngai takzet a ni. Thlarau lam a ni emaw, thilpek rawngbawlna a ni emaw, ṭhahnem kan ngaih hram hram ṭhin a ngai. Neih nun lam aiin inpekna a pawimawh a. Kohhran hi Pathianin a din a nih avangin cho chi emaw, do vak chi a ni lo a, Pathian Kohhran enkawl tura theihtawpa kan inbuatsaih a ngai a ni a ti bawk.

Kum 2023 & 2024 atana Local Church Board hetiang hian ruat a ni :

Upa (Deacons) :

1. Upa R. Biakthanga

2. Upa R. Lalnunmawia

3. Upa PC Lalthangdela

4. Upa R. VL Hmangaiha

5. Upa Lalchamliana

Tual Upa :

1. T. Upa VL Dika Pachuau

2. T. Upa C. Lalmuanawma

3. T. Upa Lalmawizuala

4. T. Upa Lalliansanga Ralte

HRUAITU TURTE (2023 & 2024)

Chairman - Upa R. Biakthanga

Secretary - Evan. Lalrelkima Renthlei

Treasurer - Upa Lalchamliana

Sawmpakhat & Buhfaiṭham sum kawltu - Upa Lalchamliana

Statistician - Upa R. Lalnunmawia

Hruaitute hi 8.1.2023 ral hmain mawhphurhna inhlan  fel tur a ni ang.

Evan. David Zothansanga Ralte leh T. Upa Lalbiakmawia ten Bialtu Pastor hi a rawn ṭawiawm a. Bro. Lalroenga'n Pathian fakna hla a sa a ni.

Bial SS Inkhawmpui vawi 56-na zo

 Bial SS Inkhawmpui vawi 56-na zo

Kolasib Venglai Bial Inkhawmpui vawi 56-na chu Dt. 9-11.09.2022 chhung khan Venglai Biak Inah hman a ni a, inkhawmpuiah hian Puitling leh Naupang lamten intihsiakna hrang hrang thlanchhuah hmangin an intihsiak a, a pumpui-ah point 1009.5 hmutu Tumpui Local chu PAKHATNA an ni.

Inkhawmpui hi Dt. 9.9.2022 (Zirtawpni Zan) khan tan Bial SS Inkhawmpui vawi 56-na bul tanna hi Upa R. Lalnunmawia, Bial SS Director-in a kaihruai a. Gen. SS Dept. kumpuan “Kan fate i chhanhim ang u” tih innghahna; Thufingte 22:6 chhiarin kum 2 zet pangngai taka Bial SS Inkhawmpui kan neih theih loh hnua Bial SS Inkhawmpui neih leh theih a ni chu lawmawm a tih thu a sawi a, Upa Lalremliana, Bial Kohhranpui Secretary-in inkhawmpui hi a hawng.

Inkhawmpui hawngtu hian Matthaia 4:2-4 chhiarin ringtute hian kan chak lohna zawnah thlemna kan tawk \hin a, chung thlemna zawng zawng hneh tur chuan Isua Kristaah kan innghah a ngai a ni  tiin, kan nunna leh chakna ber chu Pathian thu hi a ni a ti. N. Mizoram District UPC te kan vanneih em emna chu Sunday School tha tak kan neih bakah hun tha lai ber Pathian thu zirna atan kan dah hi a ni tiin, Pathian thu kan zirna hnaivai ber Sunday School hi ngaipawmawh thar ang u tiin inkhawmpui hmangtute a fuih a. Bial SS Inkhawmpui vawi 56-na chu Isua hminga hawngin a tawngtai.

Bial Secretary-in inhmelhriattirna neiin Sis. Vanlaltluangi, Venglaiin tanna hun a hmang.

Zirtawpni zan inkhawmah hian Puitling lam an intihsiak a, “Lungrual takin Lalpa i lenna tlang chungah” tih hla hmangin Lengkhawm hla intihsiak a nih bakah Zirlai Bu Quiz hmangin intihsiak a ni a, Quiz hi kum Zirlai 1-25 a tawp zawhna atanga siam a ni.

Inrinni chhunah rorel inkhawm neih niin Palai 46 an kal a, an roerl thu chhuak tlangpuite :

1. Kum 2023 Bial Sunday School Conference chungchang :

a) A hun : Dt.8th-10th/September/2023

b) A hmun : Inkhawmpui hmun tur hetiang hian ruat lawk a ni. 2023 - Project, 2024 - Tumpui, 2025 - Tuithaveng, 2026 - Venglai

c) Inkhawmpui intihsiakna tur chungchangah Naupang lamah hian Chang, Thuinchhang, Hla leh Zirlaibu Quiz thlan niin Puitling lamah Zirlaibu Quiz leh Lengkhawm hla thlan a ni a, lengkhawm hla hi 3 thlangin chung zinga an pawh fuh ber chu an sa dawn a ni.

d) Conference thlengtu puihna chu Rs. 6000/- atangin Rs. 10000/- ah tihsan niin 2023 atangin hman tan a ni ang.

e) Conference Intihsiakna Bu a ni tawh dawn lo a ni.

f) Bial Sunday School Inkhawmpuiah hian Revival-a hun tam zawk hman a nih theihna turin ruahmanna siam thin a ni tawh ang.

2. Kum 2022-ah Naupang lâng Camp cum Revival neih tum a ni.

3. Kum 2023 chhungin Bial huapin HIV/AIDS Awareness leh Sex Education Awareness neih tura rel a ni.

4. Kum 2023 chhungin Naupang Sunday School Department pualin Revival cum Sports neih tura rel a ni.

Inrinni zan atanga Pathianni chawhnu thleng naupang lamte Chang, Thu Inchhang, Hla leh Zirlaibu Quiz hmanga intihsiak niin a kar lakah hian Special Item dah tel zel a ni bawk. 

A tawp zanah hian Rev. R. Lalnithanga, Bialtu Pastor-in thutawi sawiin Luka 23:28 a chhiar a. Kan inkhawmpui hi BIal SS Inkhawmpui a anih avangin kan vaia pual a ni a, hun lo kal zel turah pawh kan ngaih pawimawh zel a tul a ni a ti. Intihsiak kan nih avangin kan dinhmun a inang dawn lova, kan dinhmun zelah lawm thiam a ngai a ni tiin rawngbawl kan intih lai hian kan fate dinhmun hi kan hrechiang lo fo thin a, kan ngaihven deuh chu a ngai a ni a ti bawk. Kan fate hi an pumraw len tawh hnuah pawh Nu leh Pa kan ni tih kan lantir fo a, thunun kawngah pawh kan lantir zel a ngai tiin kan fate chhandam an nih theihna turin nasa zawka kan inpek a, kan chet hi a ngai a ni tiin inkhawmpui hmangtute a fuih a ni.

Intihsiakna hrang hranga poin hmuh dan chu hetiang hi a ni :

BEGINNER
1.Project           139.5
2.Venglai          138.5
2 .Tuitha veng  138.5
3.Tumpui          134

PRIMARY
1.Tumpui         143
2.Tuitha veng  140
3.Project          137.5
4.Venglai         113

JUNIOR
1.Tumpui        132
2.Venglai        131
3.Project         118
4.Tuitha veng  108

INTERMEDIATE
1.Tumpui          143
2.Venglai         139.5
3.Tuitha veng   134
4.Project           128

SENIOR
1.Tumpui          138
2.Tuitha veng   136.5
3.Venglai          135
4.Project           111

DOCTRINAL
1.Venglai          87
2.Tumpui          81.5
PUITLING
1.Tuitha veng    84
2.Venglai           81
3.Tumpui           80
4.Project            71

HLA (Beginner-Primary)
1.Venglai         55
2.Project          51
2.Tumpui         51
3.Tuitha veng  46

HLA (Junior-Intermediate)
1.Venglai        53
2.Tumpui        52
3.Tuitha veng 46
4.Project        45

HLA(Senior-Doctrinal)
1.Tumpui         55
2.Venglai         52
3.Tuitha veng  49
4 Project          43

A PUMPUI KHAIKHAWMNA
1.Tumpui        1009.5
2.Venglai          985
3.Tuitha veng   882
4.Project           844

ZUAL KO

 ZUAL KO

Hming - Bro. CD Narjiary

Kum - 87

Local - Tumpui Local (Hmarveng tlang, PHE Tanky bul)

Thih ni - Dt. 25.7.2022 (3:10PM)

Vui hun - Dt. 26.7.2022 (12:00 Noon)

Vuitu - Rev. R. Lalnithanga, Bialtu Pastor

Thlanmual - Upa PC Lalthangdela

Bro. CD Narjiary chuan Cancer avangin Dt. 25.7.2022 (3:10pm) khan mual min liam san a, an chenna inah lumen niin vawin, dt. 26.7.2022 chhun dar 12 khan Rev. R. Lalnithanga, Bialtu Pastor chuan a vui a. Thlanmual lamah Bialtu Upa, Upa PC Lalthangdela hun a hmang a ni. 

A chanchin tlangpui :

A MIMAL CHANCHIN

Unaupa CD Narjiary hi July ni 17, 1935 khan Haga Ram Narjiary leh Aagni Narjiary te inkar atangin MaraiGaon, Guwahati, Assam hmunah a lo piang a. Unau pianpui hmeichhia panga leh mipa pahnih an ni. Amah hi an unau zinga upa ber niin, tunah hian a naute pathumin an boralsan tawh a. A lo puitlin hnu hian Assam Police ah lutin, hemi hnu kum 1956-ah Mizoramah rambuai avangin tirh luh an ni a. Tlabung hmunah post niin hemi hmuna a awm lai hian a nupui Darmawii nen hian intawngin, an innei ta a ni. Fate neiin Mizoramin UT alo hmuh hnuah Mizoram Armed Police ah a tang chhunzawm chho leh a. Tlabung hmun atangin Aizawl Head Quarter lamah sawn chhoh a ni leh zel a, he Aizawl hmunah hian a fate zawng zawng pawh lo piang kim vekin, kum 1994 khan 1st MAP ah Inspector niin a pension ta a ni. A pension kum 1994 Dec. thla hian Kolasib lamah a lo chhuk thla a. In leh lo te dinin, Kolasib Hmarveng hmunah ngei hian a hun tawp a lo hmang ta a ni. A phak tawka Kohhran ngaihven leh hmangaih tak mai a ni a, thawhlawm leh thilpekah te thahnem a ngai thin hle. Nihna leh chanvo chelh lo mahse Kohhran in tih tur a tuk ang chu hlen tum tlat mi a ni.

CHHUNGKAW CHANCHIN : 

Kan thlah tak P Narjiary-a leh a nupui Darmawii(L) hian fa pasarih an nei a, chungte chu :

1. Upa. Lianzara (L) h/o Kamlovi, Lawipu Aizawl

2. Hmingthanzuali, Kolasib, Hmarveng

3. Hmingthanzami (L) w/o Rochhunga, Durtlang, Aizawl

4. Rochungnunga (L) h/o Lalengkimi, Kolasib, Tumpui

5. Lalrosiama, h/o Ramluahpuii, Aizawl Republic

6. Lalengzami, w/o T. Lallawmthanga, Aizawl, Mualpui

7. Zonunsanga 

Tu 23 neiin, tuchhuan hi 57 a nei bawk a ni.

A NAT DAN :

Bro. CD Narjiary hi pa hrisel tak, fiamthu duh leh hlim thei tak, mi inngaitlawm tak, chhungkua hmangaiha, tu leh fate tihlim thei tak, a kawppui Pi Darmawii nen pawh hian inngai tak leh in thlahlel mi tak an ni a. Amaherawhchu, 2019 October ni 30-a a kawppui, Pi Darmawii'n a boralsan tak hnu hian a khua a har thei em em a, hemi hnu atang hian hrisel lohna eng eng emaw BP sâng, thawhah leh natna dang dang ten a tlakbuak chho tan ta a. Nikum 2021 April atang phei chuan damdawi inah te, enkawl ngai khawpin a chak lo chho tial tial a. Vawiin ni a, a boral chhan Cancer a ni tih hi kumin May thla vel atang khan hriatchhuah niin, heta tang hian a boral hma thleng hian ziaawm lam pan thei tawh lovin, min lo peihlohsan ta a ni.

DISABLE SUNDAY HMANG

DISABLE SUNDAY HMANG

Dt. 3.7.2022 (Chawlhni) kha NEI UPC ten kumtina kan hman thin Disable Sunday a nih angin kan Local pawhin he hun hi zan lamah kan hmang a, mi 3 hnenah tanpuina pek niin inkhawm pawh kan tha hle.

Upa R. Biakthanga'n inkhawm a kaihruai a, hetianga hun kan hmang leh thei chu lawmawm a tih thu sawiin Kohhran te hei aia kan phuisui leh hunah phei chuan kan hâk kan zauh leh zual thei ang a ti.

Upa R. Lalnunmawia'n thuchah a sawi a, Pathian thuah pawh rualbanlote tanpui hi Lal Isua lo dai tawh ram a ni tiin Sam 37:1-4 hmangin thuchah hetiang hian a sawi.

Sorkar-in rualbanlote pawh a humhalh a, a humhalhna dante pwh a siam hial a, 1996 ah phei chuan an thuam ṭha nghe nghe a ni.

Sorkar-in rualbanlo a ṭhen hran zingah hian Mizoten kan hmelhriat tam ber chu taksa lama rualbanlo leh rilru lama rualbanlo te hi an ni.

Rualbanlo-a kan ngaih chiah loh Phâr te pawh hi Sorkar hian rulbanlohnaah a pawm a, ṭawng lama harsatna nei te, khaw hmuh leh ri hriatna lama harsatna neite pawh a huam tel vek.

Sorkar hnaah pawh hian 3% hi rualbanlote tana dah bik a ni.

Sorkar pawh hian Disabled (thil tithei lo) ninlovin tihtheihdan danglam (Differently abled) tiin an thlak hial tawh

Sorkar hmun pawimawhah leh puipunna in lianahte pawh hian Nawrlirh (Wheelchair) nawr luh theihna tur siam tur a ni.

Rualbanlo kan tihte pawh hi Pathianin duh taka a siam an ni tih hriat reng tur  ni a, chuvangin chhaih nawmnah emaw entleu emaw endawng tur an ni lova, hmangaih taka enkawl zawk tur kan ni.

Pathian-ah hlimna kan chang a, kan lawm em em thin a. Lamtuala kan han let phung maite, thlarau ṭulna avanga taksa thunun thei lova kan awmte, thlarau lam hla kan han sa leh mai ṭhinte hi Pentecost zia a ni a, Pentecost mite ram a ni.

He ram hi kan ram a nih avangin chhuah san lovin he ramah hian kan awm reng a ngai.

Pathian chawimawina atan kan sum leh pai emaw, kan ran emawte kan han thawh ngawt zel mai a, hengte hi mi ṭhenkhat tan chuan holam leh ṭul lo, nuihzatthlak leh âtthlak mai a ni. Mahse hei hi Petecost mite ram a ni. He ramah hian i awm zel ang u. Chawimawina te hi i pe thur thur ang u.

Lengkhawm hla tui taka kan sa ṭhinte pawh hi Pentecost mite ram a ni a, kan uar zel tur a ni. He ram hi kan kalsan ṭan ta a ang viau mai a, he ramah hian i kir leh ang u.

Thuthlungah hian i awm reng ang u. He ram hian awm la, rinawmna um zel rawh  tih hi thuthlung ram hi a ni. He thuthlung ram hi Pentecost mite ram a ni a, he ramah hian kan awm reng a ngai. Kohhran inkhawm, puipun, SS ah te hian Thuthlung uar zawkin in zirtir zel ang u.

Hemi zan thawhlawm hi District-ah chhunluh tur a ni.

LAWMPUINA HLAN

LAWMPUINA HLAN

Zanin, Dt. 27.6.2022 (Thawhtanni) khan Local PYD chuan an member zirnaa hlawhtling tharte leh infiamna lama hlawhtlingte lawmpuina hlanin lawmpuina atan hian THUZIAK FRAMED an hlan.

Lawmpuina hun hi T. Upa Lalmawizuala, Local PYD President-in kaihruaiin kumtin mai hetiang hun hman a ni thei thin chu lawmawm a tih thu sawiin Pathian malsawmna a nih thu a sawi a, inkhawm zawng zawngte leh hlawhtling tharte hnenah lawmthu a sawi a ni.

Sis. C. Lalruatfeli, Local PYD Treasurer-in hunserh a hmang a, 1 Kor. 9:25 a chhiar a; hlawhtlinna changtharte chu fuihin mahni inrhiatchiana kan tuina ber hriaa kan thlan thiam a pawimawh a ni a ti a. Pawnlam mai nilova chhungril lam zawka inrintawkna neih a ngai tiin hemi atan hian lehkhabu chhiar tam hi a tangkai em em a ni a ti bawk.

T. Upa Lalbiakmawia, Bial PYD Vice President-in Tita 2:8-9 thu hmangin thuchah a sawi a. PYD Member zingah chawimawi tur kan la awm zelte hi thil lawmawm tak a ni tiin, pawl 10 leh 12 te hi hlawhtlinna bul kan tanna a ni a ti a. Hlawhtling chhunzawm zel tur chuan keimnahni theuh hi kan pawimawh a ni tiin kan taihmak a ngai a ni a ti. Midangte hmuhah hian ringtu kan nihnate, kan tak ziate leh kan zahawm ziate hi a langchhuak tur a ni tiin inkhawmte a fuih a ni.

He hun atana thusawi tura sawm bik, Upa Lalremliana, Bial Kohhranpui Secretary hnen atangin Sabengtung tih thupui hmangin thuchah ropui tak mai ngaihthlak a ni. Zirna kawngah hian Pawl 10 pass chin hi N. Mizoram District PYD member zingah 45.06% awmin Bial chhungah hian 47.92% kan awm a, Tumpui Local bikah hian member zawng zawng atanga chhutin 57.14% kan awm a, hei hi thil lawmawm tak a ni a ti.

Sabengtung chu Ran â tia sawi niin mi â sawina leh tehkhinna atana hman a ni a, mihringte pawh hi Sabengtung (Mi â)-a min siam thintu thil pathum a awm a ni tiin heng point 3-te hi hetiang hian a sawi fiah.

1. Ruihhlo - Ruihhlo hian mifing pawh mi â-ah min siam thei a, kan thlen chin tur min thlen tir lo fo thin tiin hemi laka kan fihlim reng hi a ngai a ni a ti.

2. Ngaihzawng - Mifel leh tha tak pawh ngaihzawng avanga buaita leh nun hloh ta tam tak an awm tiin kan nun chhiat phah thak khawpin ngaihzawng kan nei tur a ni lo a ti a. Zirlai nih chhung phei chuan  ngaihzawng neih loh tawp a finthlak zawk tiin Sabengtung (Mi â)-a min siamtu hi kan pumpelh a ngai a ni a ti.

3. Mobile phone - Mobile phone hian kan hun hlu tha tam tak min khawhral sak avangin kan nin tur ni pha lovin min siam thei a, a hman dan tawk kan thiam hle a ngai a ni a ti a. Nikhatah kan hman tur hun chhung bituk thiamte pawh a tul a ni tiin Sabengtung (Mi â)-a min siam lohna tura kan fimkhur a ngai a ni a ti.

Sam No. 37-na tarlangin, kan hun leh kan nun zirna lama kan inpumpek laiin kan thiante chuan duh duh lo ti mah se, thil thalo titute avanga intilungngai tur kan ni lova, fel lo taka tite pawh kan awt tur a ni lo tiin hlawhtling tharte leh inkhawmte a fuih a ni.

Hemi hnu hian Sis. C. Lalruatfeli, Local PYD Treasurer-in lawmman sem a buaipui a. Pawl 10 pass thar mi 3,  Pawl 12 pass thar mi 5, BA - mi 1, Sport lama hlawhtling mi 1 leh PSM zir chhuak thar mi 1 hnenah lawmpuina thuziak hlan an ni.

Zaithiam 3 zaiin; Bro. Vanlalliana chuan "Ka tho leh ang" tih hla a sa a, Sis. PC Vanlalhmangaihi'n "Nang chauh" tih hla a sa a, Sis. C. Lalhminghlui'n "Danglam tura koh" tih hla a sa bawk a, an zaithiamin an zai nung hle a ni.

Inkhawm banah hian thingpui leh a hmeh tui tak eia in ho a ni.

Inkhawm hun hman dan tlangpui :

Chairman    -    T. Upa Lalmawizuala, Local PYD President

Hunserh      -    Sis. C. Lalruatfeli, Local PYD Treasurer

Thusawi      -    1. T. Upa Lalbiakmawia, Bial PYD Vice President

                         2. Upa Lalremliana, Secretary, Kolasib Venglai Bial

Solo            -    1. Bro. Vanlalliana

                 2. Sis. PC Vanlalhmangaihi

                 3. Sis. C. Lalhminghlui

Inkhawm zat - 44

Thawhlawm zat - Rs. 790/-

Lawmpuina hlante :

PSM - Evan. Zoremmawia Hlondo (Grade - A+) 

HSLC

1. Bro. David Lalmalsawma - II Div.

2. Sis. Lalnunhlui Hlondo - II Div.

3. Sis. Lalrinsangi - III Div.

HSSLC

1. Sis. Lalduhkimi (Arts) - Dist. (L in Eng, Mz, Edu)

2. Sis. PC Vanlalțhapuii (Arts) - III Div.

3. Sis. C. Lalhminghlui (Arts) - III Div.

4. Bro. PC Vanlalhruaitluanga (Arts) - II Div.

5. Bro. Lalroenga (Science) - II Div. 

Bachelor of Arts :

1. Bro. Jacob Lalchhandama (Political Science) - Grade A

State level 25th AMKA Karate Championship 2022

1. Bro. Henry Lalrinawma - Bronze medal 2 (Kumite & Kata)