NILAI ZAN THUPUI BU 2023 BIH THUAKNA

 NILAI ZAN THUPUI BU 2023 BIH THUAKNA

Zorema Hlondo

Kum 2023 Nilai Zan Thupui Bu chu tihchhuah a ni ta a, a lawmawm hle mai.

Thupui Bu hi N. Mizoram District UPC-in a Publish niin copy 2500 siam a ni a, kan District chhunga member awm zat ngaihtuah chuan a tam lo hle mai a, hei hian lehkhabu lei kawngah Kohhran mite kan than harh a ngaih zia a tilang theiin ka hria. Copy 2500 tal hi chu kan lei zo thei turah ngai phawt ila. TM Offset Printing Press, Canteen Kual, Dawrpui ten an print a ni a, phek 227-a chhah a ni.

A kawm pawh kan Kohhran rawng nena inhmeh tak mai hman niin hmuh a hahdam hle mai a, a ràn dan pawh a mawi tawk viau.

2023-ah hian Thupui 42 zir tura ruahman niin heng thupuite hi mi 7-in an ziak a, a ngaihnawmin a hlawkthlak dawn.

Kan miril leh chhuanvawr; Evan. Lalchhuanmawia Sailo hian Tlanna leh Chandamna a ziak a, rinna kawnga kan inhnial thinna tam tak a tihkian bakah kan fiah phah hawk pawh a beisei awm. Hemi huangah hian Thupui hrang hrang 6 a awm a, TLANNA tih awmzia tawng bul lam atanga a rawn chhui chhoh dan leh a sawi fiah zui dante hi a bengvarthlakin a tuiawm asin aw...

Kan Pastor Senior zinga mi; Rev. HF Malsawma hian Ringtute mawhphurhna a ziak a. Ringtute mawhphurhna chungchanga ka chan loh khanah a rawn chhuak daih mai.

Kan mi senior; General thlenga chanvo pawimawh tak chelh a Kohhran min lo hruai tawh thintu, Rev. K. Darsailova'n Kristian Chhungkua a ziak a. Tawnhriat tha tak nei a nihna a lang leh a, Kristian chhungkua tawitea a hrilhfiah dante hi a va tawk tak.

Kan Pastor chawl ta; Rev. RC Puia'n Pentecost mite tih tur reng niawma mawi, Thlarau Thianghlim Humhalhna a ziak a. Engvanga Thlarau Thianghlim chu humhalh ngai nge a nih a rawn chhui chhuak nalh leh hle.

Pastor dam thluam mai; Pastor K. Ainawna hian amah ngeiin Pathian malsawmna a dawn a taka a hmanchhuah nena inhmeh em em mai, Pathian tihdamna a ziak a. Isua thiltihtheihna a taka hmuh ve ti chakawm rum rum thei khawpin a ziak chuak ropui nia!

Bial vawn kawng leh Kohhran Inkaihhruainaa mitha em em mai; Rev. C. Laltlanchhuaha hian Kohhran Inrelbawlna a ziak a. Hruaitu pawimawhna atanga bul tanin Kohhran member hrim hrimte mawhphurhna huam telin, tumah kal kan bik pawh nei lovin kan hmasawnna tur hrang hrang a rawn tarlang a. Agenda chung changa a thuziahte hi a tuiawm a nia....

Pastor zinga la thar lam mah nise, Pathian thu leh zirna kawnga mi duai lo Pastor F. Lalchhanhima hian Hun hnuhnung Chhinchhiahna a ziak a. Ka thupui tuipui lutuk loh a ni chungin han chhiar thlen meuh chuan tui loh a har tulh tulh mai a, tui loh luih hleihtheih pawh ni lo khawpin mitthlaa lang chuai chuai khawpa ka'n chhiar pek chu!

2023 Thupui Bu hrim hrim hi a lan dan leh a thu an chhut dan (Layout & Type settings) a fuh viau mai a, a phek number an dah dante hian a tilang changkang leh zual a. Tha ka tih deuh chu a phek dinglam zelah Thupui hlawm kengtu hming dah zel a ni a, Thupui tin hi 6-ah thendarh vek a nih avangin hei hian eng thupui hlawm ber nge kan zir tih a tichiang zel a, editing board te leh a bu buaipuitute an fak awm ngawt mai.

Hei bakah hian kum danga kan sawi tel thin; a hawrawp hi a sin lutuk ta lo bawk a. Tlema kum tam deuh; mit fiah vak lo tan pawh Tarmit nen chuan harsa lutuk lovin a chhiar theih a beisei awm.

A tir lama thu lawmtawi ho sawifiahna an dahte hian a ti Lehkhabu lehzualin ka hria a, tehfung lek dawn ta ila hei hian a vawrh dawrh theiin ka ring.

Duhkhawplohna tlem :

Hetiang Lehkhabu buaipui hi ka tlin ve hauh loh tur a ni nachungin duhkhawplohna te ka' lo nei ve khang lang a. A kawm hma lamah hian Kohhran hming chauh awm hi ka duhkhawp lo deuh a, kan Logo chuang tel atan ka lo it ve deuh hei chu.

Uluk taka endik a ni tih a hriat em em rualin hawrawp (Alphabet) hman dan inang lo awm hi inang tlang thei se mit a tihahdam leh zual angem aw ka ti... Entirnan; Kohhran tihah hian a thenah K hman a ni a, a thenah hian k hman a ni leh ang lawi a. K hi hmang vek se tihte ka lo ngaihtuah a.

Tin, a phek veilam zelah hian NILAI ZAN THUPUI - 2022 tih aiah a thupui thensawm hming hi dah zel se a fuh zawk angem aw tih ka ngaihtuah a, a fuh lo zawk maithei bawk a. A kawmah a Bu hming tak chu a awm tawh tho avangin heti zawng hian awm ta se zirtu tan pawh phek tinah khan Thupui thensawm hming kha keu let ngai lovin hriat zung zung a tih awlsam phah angem aw... Hriatna inchen lo tak tak kan ni ve hlawm sia.

Han sawiselna mai tur a vàn em avangin kan khawn chawp deuh mai mai a ni e

Taima takin, kim takin Thupui hi zir chhuak vek ila, sawiho tura an rawn dah chhuahte pawh kan duh lam hawi hawiin kan lei kan hawl kual ve leh ang a. A Bu tichhuaktuten Thuhmahruaia an ziah angin Kohhran hote hian hlawk takin zir theuh ang u.