ZUALKO

 ZUALKO
Hming : Sis. R. Laldinkimi
Kum : 39
Thihchhan : Cancer
Thihni : Dt. 14.5.2023 (2:05PM)
Vui hun : Dt. 15.5.2023 (12:00Noon)
Vuitu : Rev. R.Lalnithanga, biaktu Pastor
Thlanmuala hun hmangtu : Evan. Lalrelkima Renthlei


Dt. 21.5.2023 (Chawlhni zing) dar 7am khan Kohhranin ralin, Evan. Lalrelkima (Bialtu)-in a kaihruai a. Kohhranpui, Local PYD leh Bial PYD-ten ralna thilpek an hlan.

Chhungkaw aiawha thusawitu, Upa R. Lalnunmawia chuan an nat chhunga buaipuitute hmangaih taka tawngtaipuitute zawng chungah an lawmzia sawiin, Kohhran mite hnenah lawmthu a sawi.

Evan. Lalrelkima Renthlei chuan thuchah sawiin natna avanga lungngaihna kan tawh lai hian Pathian mite tawrh dan erawh a danglam a ni tiin thlamuanna nen natna pawh an tuar tlang thin a ni a ti a. Pathian hnen thleng thei tura inbuatsaih zel turin ralnaa telte a sawm a ni.

R. LALDINKIMI CHANCHIN TLANGPUI

R. Laldinkimi hi Pu R.Lalbiaksanga (L) leh Pi Thangzawni (L) te inkarah October ni 28. 1984 khan a lo piang a, Unau piang 9 zingah a naupang lam atanga chhiara pathumna a ni a. A unaute chu :-

 

1.         R. Lalawmpuii W/o Lianchungnunga (L)

2.         Zomuanthangi

3.         Lalnunmawia

4.         Lalthannguri w/o Nangdaihkap. Champhai

5.         R. Lalnunzira

6.         R. Vanlalkhawngaihi

7.         R. Laldinkimi

8.         R.M.S Dawngkimi

9.         Lalremthangi (L)

  An unau hi a naupang ber hi a sen laiin a boral a, a bak hi an la dam kim vek a ni.

 Zirna leh eizawnna lamah : Education line pangngai ah Pawl 12 thleng a zir hnuah Hindi a zir chhunzawm a, Hindi ah hian Graduate in Centrally Sponspor Scheme in Bairabi ah Hindi Zirtirtu in a thawk a. An Scheme a zawh hnuah Sorkar in a rawih chhunzawm tak loh avangin hna a thawk zawm lovin Private School ah thawk leh a, a dam loh takah hian heta tang pawh hian a bang leh ta a ni.

Kohhran Rawngbawlna lamah : Kohhran ah hian a phak ang tawkah chuan rawng a bawl ve a, Bial leh Kohhran Zaipawl ah te Member a ni tawh thin a. Naupang lamah Sunday School Zirtirtu a ni mek a, PYD ah Local Committee Member a ni mek bawk a. Group ah Treasurer a ni thin a, mahse a dam loh tak avangin he a nihna atang hian banna a thehlut bawk a ni.

 A nat dan : Kum 2017 vel khan a hnute hi a thang vak a, na a tih avangin Aizawl ah entir a ni a. A hnute chhungah tisa thang thei a awm tiin an zai a. Cancer a nih leh nih loh te Biopsy an la a, mahse cancer hnuhma an hmu lo a. 2020 khan a hnuhte hi a rawn thang leh a, hei hi Kolasib Damdawi Inah an zai leh a, hemi tum hian a hnute hi an paihsak nghe nghe a. Hemi tum pawh hian Biopsy te lak a ni leh a, mahse cancer hnuhma hmuh a awm chuang lo a ni.

 

            Nikum December khan hritlang a nei a, a khuh a reh theih loh avangin January thla khan Kolasib Damdawi In ah a in entir a, TB a nih leh nih loh te an test an mahse TB hi hmuh a ni lo a. January thla tawp lamah a thawk a hah avangin a in entir leh a, a chuap ah Tui a tling tih hriat a ni a. Nazareth Nursing Home ah te kan in dah lut a, a chuap a tui awm te siak a ni a. A ziaawm leh deuh hnuah January thla tawp hian kan chhuak leh a. A hnuah Kolasib Hospital ah a inentir leh reng tho a, TB ni thei an hriat avangin TB Test chi hrang hrang an nei , mahse an hmu mai thei lo. Mahse TB Symptom a neih nasat em avangin TB Cell lamah an refer a, an ni hian TB Damdawi te an lo pe a, a tha leh mai turah kan ngai a. TB Damdawi hi thla khat chuang a ei hnuah pawh awmzia a neih theih tak loh avangin a in en tir leh a, a chuapah tui a awm tih an lo sawi leh a, siak an tum a, mahse tui awm anga lang siin siak tur an awm thei talo a ni.

March ni 23 khan Durtlang Damdawi In ah CT Scan tih a ni a. Hetah hian a chuap ah bawk a awm tih hriat a ni a. March ni 27 ah Aizawl Civil Hospital ah Dr. Don Halliday kan rawn leh a. FNAC te kan ti a, mahse Cancer niin an hriat loh avangin Phai lam pan mai turin mi an rawn a. April ni 8 khan Cachar Cancer Hospital and Research Centre ah en tir a ni a. Hetah hian Test chi hrang hrang an lo tih hnuah Chuap Cancer a nih thu an sawi ta a. Chemotherapy a khai hnuah an rawn haw chho a. In ah awm rei lovin Dt 15.4.2023 khan Nazareth Nursing Home ah bawk kan in dahlut leh a ni.

 Kar khat a awm hnuah a ziaawm deuh a ngaiin an rawn chhuah tir a, mahse zankhat chauh in ah a awm hman tihin a zual leh avangin Nazareth ah bawk hian kan in dah lut leh a. In a haw tawh lovin Dt. 14.5.2023 chawhnu dar 2 khan van kohna chhangin chung lamah min haw san ta a ni.

Lawmthu sawina : Kan nau Laldinkimi dam loh leh a boral chhungchangah hian lawmthu sawina tur tam tak kan nei a.  A dam loh chhung zawnga enkawltu Doctorte leh Nurse te chungah lawmthu kan sawi tak zet a. Kan manganna hriain min thlamuanin duat takin kan nau hi min enkawl sak a, an chungah lawmthu kan sawi a ni.

Tin, kan dam loh tirh atangin thenawm khawveng, thian tha leh chhungkhat laina min hmangaih a min ngaihven reng tute, a enkawlna tura sum leh pai, tha leh zung seng a min tanpuitute, Lirthei a phurh a ngaih a ui hauh lo a kan mamawhna zawna min hruai thintute chungah lawmthu kan sawi a. Hei bakah hian kan nau hi a dam leh theihna tur atana Thahnem ngai taka min tawngtaipuitute zawng zawng chungah kan lawm tak zet a ni.

 A boral hnuah YMA Nula leh tlangval, Nu leh pa ten theih tawpin min buaipuina ah lawmthu kan sawi a. Kan tana in thahnem ngaihnate, in inpekna te hi keini chuan kan rul seng lovang che u. Mahse engkim neitu Pathian chuan a let tam takin a rulh che u kan beiseiin hei hi kan duhthusam a ni e.