MI TIN TA TUR CHANCHIN THA

MI TIN TA TUR CHANCHIN THA

Luka 2:10 : Tin, vantirhkoh chuan an hnenah, “Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni'

Krismas laia kan Kohhran Banner tharah aKrismas a kan thupui hman tur ni awm tak 'Mi tin ta tur Chanchin tha' tih kan tar a. Krismas Programme kan hman chhungin mi 9 in thu kan sawi a. Kan thupui lam hawi a thu sawi reng reng kan awm lo. Kei ngei pawh thusawi zingah hian ka tel a, ka rilru ah kan Banner a kan tar lam hawi thu reng reng hi a awm lo. Mahse Krismas Programme kan hman zawh tawh hnuah ka rilru ah a rawn lang leh roh si. Thai kawi mai mai teh ang.

He thu hi ka rilru a a rawn luh chhan tak hi ho tak a ni. 'Krismas kan hman mek hi Isua Pian cham tak tak a ni lo tih kan hre vek a. Isua hi December ah a piang em tih pawh kan hre lo,' tih Upa Biaka'n Inkhawm a kaihhruaina ah a sawi a\angin Isua pian hun awm ang hi ka chhut mai mai a, Baptistu Johana Pa, Zakaria rawngbawl hun lai atanga chhutin Isua hi September thla chawhnu lam emaw, October thla chawhma lamah a piang mai lo maw le? tih te ka chhut mai mai a. December thla hi Israel ramah chuan an thlasik lai niin Fur ruahtui tam lai a nih bawk avangin phul a riah chi a nih loh dan te ka chhut kual a, hetihlai hian Berampute hnenah Vantirhkoh thusawi hi ka rilru ah a rawn lut ta a ni.

Berampu ten Beram an ven lai khan Lalpa Vantirhkoh an zingah a rawn ding thut mai a. Berampute kha tun lai kan Zoram Kristian tam tak ang hi nise chuan Vantirhkoh an hmuh avang khan an va han hlim dawn em. Vantirhkoh an hmuh thute khan Biak In hrang hrangah an sawi ang a, an hmuhna lai hmun te kha mi tam takin an tlawh leh hut hut ngei ang. 

Mahse Bible ah hian Vantirhkoh inlar hi kan hmu nual a, an ni hian an inlarna te hnenah Pathian in mipuite tan emaw, an mahni tam emaw a thuchah a neih te an rawn hrilh thin. Hei hi an hriat chian em avangin Berampute hian Vantirhkoh a rawn inlar chhan ang tak a thuchah hriat tumin an nghak a. Isua chibai buk tur hriattir an ni ta chiah reng a ni.

Berampute hnenah hian Vantirhkoh hian, 'Mi tin ta tur Chanchin tha' a rawn thlen thu a sawi a. Chanchin tha hi engnge a nih tih hi kan hriat chian loh chuan mi tin ta tur a nih leh nih loh pawh hi kan hre fiah thei dawn lo tihna a ni.

Bible kan chhiar chuan Mihringte hi Evi leh Adama te bawhchhiatna avanga sual a tlu ta kan nih thu kan hmu a, Pathian nen a lengdun \hin kha Pathian hnen atanga mihrang niin, chhandam ngai kan lo ni ta a. Chuvang chuan Pathian hian chhandam kan nih theihna tur kawng hrang hrang a ruahman a, mahse chung chu Isaia'n, 'Khum chu thluan nân a tawi lutuk si a, puanthuah chu inkhuh nân a te lutuk bawk si'. (Isaia 28:20) ang deuhin mi zawng zawng huap lo, chhungkua emaw hnam bil emaw ang lek a nih thin avangin mi zawng zawng tan chanchin \ha a tling phak lo thin.

Nova hun laiin khawvel sualna a nasat avangin Tui let hmangin Pathianin khawvel a hrem a. Hemi atana chhandam an nih theihna turin Nova hnena Chanchin tha thleng chu, 'Nang leh i chhungte tan Lawng tuk rawh' tih a ni. (Gen 6:14) Lawng len zawng turte, a sak dan tur zawng zawngte pawh a hrilh vek bawk. Thing a hman turte leh a char nan a hman tur zawng zawngte pawh a hrilh. Tui a let khan an chhungkua mi 8 chiah chhandam an ni.

Mi tam takin Nova hian Lawng tuk ve turin midang pawh a hrilh thu hi an sawi thin. Mahse hei hi chu thawnthu lam emaw, zeldin thubawl emaw deuh a nih hmel. An tanchhan ber Petera Lehkha thawn ah pawh hian Nova hian Lawng tuk ve tura midang a hrilh thu a inziak lo a, Nova lawng tuk chhung zawng Pathian khawngaihna in a nghah thu a ziak mai a ni .(I Pet. 3:20) A nihna takah chuan Nova hnena Pathian thu  thleng kha chu amah (Nova) leh a chhungte chhandam an nih theihna tura Lawng tuk kha a ni a. Midang a huap ve lo a. Mitin tan chanchin tha a tling phak lo a ni.

Genesis Bung 19 thu kan chhiar chuan Sodom leh Gomorra hrem chungchangah pawh Lota leh a chhungte chhanhim an awm thu kan hmu leh. Hetah pawh hian Lota leh a chhungte bak hi Pathian in chhandam an nih theihna tur kawng a hawng tih a lang lo. Vantirhkoh te pawh khan Lota hnenah an khua Mei leh Kat in a kan tur thu kha a makpa te hrilh turin an tih bak midang an sawi tel lo. Sodom leh Gomorra hremna atanga himna tura Chanchin tha khan mi zawng zawng a huap lo a, Lota te chhung chauh a huap.

Pathian in Abrahama hnenah amah leh a thlahte tan chhandam a an awm theihna turin Serhtan tur thu a pe a. (Gen 17:10) Serhtan chu an inkar a kumkhaw thuthlung a nih tur thu a sawi bawk. (Gen 17:13) Mahse hei pawh hi Pathian leh Abrahama inkar chauh a ni. (Gen 17:11) Mi zawng zawng a huap lo a. Jakoba fanu Dina-i neih an duh avangin Sekem mipuite pawhin an serh an tan ve ringawt a, an vaiin thah chimih an ni vek mai a ni. (Gen 30:21-26)

Hetiang hian Pathian in a mite tan an chhandamna tur kawng hrang hrang a siam sak a, mahse hei hi mi zawng zawng tan chanchin tha a tling phak lo vek a, chhungkaw mal tan te, hnam bil tan te a ni a. Hei vang hian Pathian chuan mi zawng zawng chhandam an nih theihna turin 'Mi tin tan Chanchin tha' rawn thlen turin amah ngei chu khawvelah rawn kalin thuthlung tha zawk a rawn siam ta a ni. (Heb 8:7)

Lal Isua hian a thisen in kan tan thuthlung thar a siam dawn tih a zirtirte hnenah a sawi a. (Luka 22:20) Chu a thisen chu Kalvari tlangah chhuakin chhandam kan nih theihna tur thu min hnutchhiah a. Chu a thu chu Simna thu leh Sual ngaihdamna thu a nih thu leh, Chu simna leh sual ngaihdamna thu chu Jerusalem atanga puanchhuah a nih tur thu a sawi bawk. (Luka 24:44-47). Chu chu Mitin tan chanchin tha a nih tawh avangin khawvel zawng zawngah kal a, hnam tin hnenah puang chhuak tura hriattir an ni ta bawk. (Matt 28:19, Marka 16:15)

Pentecost Ni ah Simna leh sual ngaihdamna thu hi Petera'n puangchhuakin, Sual sim a, Sual ngaihdam nan a Isua hminga Baptisma chan a, thlarau thianghlim dawng tur kan nih thu a sawi a. (TT 2:38) Simna leh Sual ngaihdamna hi hnamtin a hrilh a, a lo ringte chuan Baptisma an chan tur thu leh, chhandam an nih tur thute, chu chanchin tha chu ring lo te chuan thiam loh an chan tur thu kan hmu bawk a ni. (Mark 16:15)

Hun hmasa lamah Pathian in mihringte chhandam an nih theihna tur a sawite kha hnam tin tan a ni ve lo a, hnam tin huap zo lo. Isua Krista hi khawvel ah rawn piangin, mihring te angin rawn kal lo se nang leh kei atan hian chhandamna kawng a inhawng lo a. Abrahama thlah, Israel kan tihte tan lo chuan khawvel ah chhandamna a awm lo. Mahse Isua a rawn pian avanga chanchin \ha a rawn thlen hi chuan hnam tin a huap tawh a, Israel leh Jentail a thliar lo a, Mi rethei leh hausa a thliar tawh lo a. Chuvangin Nang leh kei pawh hian Pathian chhandamna kan lo chang ve thei ta a lo ni. Lalpa chu fakin awm rawh se.

Chuvangin, kan tana Chanchin \ha lawmawm em em rawn thlentu Isua hi fak ila. A rawng i bawl ang u.