KOHHRANIN RAL

 

KOHHRANIN RAL

Dt. 5.1.2025

 

Tukin dar 7 khan Sr. Upa Rualchhina chu Kohhranin a ral.

Ralna inkhawm hi Upa R. Vanlalhmangaiha, Bialtu Upa chuan kaihruaiin thuchah a sawi a. Upa Lalchamliana, Local Treasurer-in ralna thilpek a hlan a, ralna atan hian Thuziak leh pawisa fai hlan a ni. (Church Board member te leh Sr. Upa te an boral hian sumfai bakah thuziak hlan tel ṭhin a ni)

Sis. Lallawmi'n chhungkaw aiawha thusawiin, Sr. Upa Rualchhina hian Isua Krista a hriatchian thu leh a ṭawngṭai nasat ṭhin thu a sawi a, kohhran hruaitute pawh a ngaih ṭhin thu sawiin an chhiat tawh chungah Kohhran hote hnenah lawmthu a sawi bawk.

Thuchah sawitu hian 2 Samuela 12:23 chhiarin thihnain a fan loh chhungkua an awm loh thu a sawi a. Lusun mangan tak tak lai chuan Pathian thu hi rilruah a lut thei lova, hmangaih famtate chanchin bak hian thinlung a luah thei ngai lo. Chutih mêk lai chuan Pathian kan mamawh nasat zual hun lai tak a ni tih hriaa Pathian kan belh tlat a ngai a ni a ti a. Kan hmangaih kal tate hi kan au kir dawn lova, keimahni zawk hi an hnena kal tur kan nih avangin an hnen thleng thei tura keimahni zawk kan inbuatsaih a ngai a ni a ti.

Sr. Upa Rualchhina hi N. Chaltlanga an awm laiin UPC rawngbawltu rawngbawlna an zui avangin Presbyterian atanga hnawhchhuah a ni a. Hemi hnu hian UPC zawmin Baptisma pawh a chang a. Kohhranah eng eng emaw harsatna a awm avangin hmun hrang hrangah an chhuak darh a, a ni pawh hian Salvation Army zawmin hun rei tak chhung SA-ah hian rawngbawltu a ni a. Sg. Major ni chungin thalai lam hruaitute pawh a ni nghe nghe.

Kolasib Venglai Bial chu Rev. R. Vanlalawia (tunah CCPC-ah Project Director a ni mek) chuan a rawn bial a. Ani’n a bial lai hian kum 1998-ah UPC-ah lo let lehin Dt. 13.3.1998 khan baptisma a chang a. Hemi hnu lamah hian Local Church Board Chairman-te niin Local Missions Director-te a ni a, Local SS lamah pawh sum enkawltu niin Treasurer-te pawh a lo ni tawh a ni.

2011 khan a kum a lo tam deuh taka vang leh taksa lamah pawh a lo chak loh tan deh avangin Senior Upa-ah dah a ni a. Hetih lai hian Sr. Upa-te hi a tul dan azirin Local Church Board-ah pawh an la tell ai kha a ni a, a ni ho hian Biak In te sualin Kohhran tan thahnemngai taka rawng bawl thin a ni a, a thih ni thleng hian he dinhmun zahawm leh ropui tak hi a chelh a ni.

Pathian ngai em em thin a nih bakah inkhawm taima em em a ni a, a taksa a chak loha amaha a kal hleih theih loh, kaih hial a ngaih hnu pawha Biak In pan hram hram thin a ni. Tawngtai mi tak niin hlathu mawi tak nena a tawngtai thucham thin hian midangte rilru pawh a tizawp fo thin a, tap zawih zawih chunga Pathian auva tawngtai thin mi a ni a. Hla te hi a hre em em a, amah chauh pawh hian mittui tla zawih zawihin a zai fo thin. Ngaihtuahna fing tak nei a nih avangin a thluak hi Kohhranin a chhawr em em thin a ni.

UPC-a a lo let leh hma pawh hian an in hi Kohhran ho chuankaina ber pawh a ni thin a, Naupang SS zirlai zirnante leh inkhawm nante pawh hman thin a ni a, ei leh in buatsaih nikhua pawhin an bungrua phal taka hman tir thin an ni a. Tuizem nei tha hmasa an nih avangin an tui te hi Kohhran hian a hmang nasa em em a. Hei mai ni lo hian tum engemzaw zat Pathian chawimawina pawh an lo pe tawh a ni.

Hetianga Kohhran tana mihlu tak mai kan chan hi Kohhran tan chuan channa nasa tak a ni a, a hmun ruak hi a zau hle ang.