KOHHRANIN RAL :

 KOHHRANIN RAL :

Dt. 27.8.2020 (Ningani)-a chatuan ram min pansan, Bro. C. Vanlalhriata chu tukin (Dt. 30.8.3020_Chawlhni Zing) khan Kohhranin a ral.

Ralna inkhawm hi zing dar 7 ah ṭan a ni a, Bialtu Evan. Lalrelkima Renthlei in kaihruaiin Sis. Lallawmi (Unaupa Hriata Nu)-in chhungkaw aiawhin thu a sawi a, Upa R. Biakthanga, Local Treasurer in ralna thilpek a hlan a, Pentecostal Men Fellowship lam pawhin an member a nih angin ralna thilpek an hlan bawk.

Evan. Lalrelkima'n thuchah sawiin "khawvelah hian mi zawng zawng angkhata min hruat rualtu chu thihna hi a ni" tiin hetihlai hian Hebrai ziaka kan hmuh angin mihring tan vawikhat thih ruat a nih thu kan hre thei a. 1 Korinth bung 15 a kan hmuh angin kan nundan a inang lo angin tisa hrang hrang pawh hi a inang lova. Chuvangin 1 Kor. 15:50-a kan hmuh angin Vanrama kan awm/kal theihna tur chuan kan lei taksa hi Vana awm thei/tlak tura tihdanglam a ngaih thu kan hmu a, chu tihdanglama kan awmna tam ber leh lian ber chu thihna hi a ni a. Mitthi ngaihna hmang hian Setana hian min bei ve fo ṭhin tih kan hriat a ngai a, chu chuan Pathian lam kan hawina a dal fo ṭhin. Ringtute kan innghahna ber chu engtik niah emaw kan tho leh dawn a, chumi kan nghah chhung chu Bible ṭawngkamin "Muhil" tia koh leh sawi a ni tiin a sawi.

Bialtu Pastor, Rev. B. Vanlruata'n thutawi sawiin khawvelah hian natna leh harsatna hi fel vanga pumpelh ngawt tur emaw, sual vanga tawrh bik pawh a ni chuang lo a, Pathian thlarau kan chan hi khawvel harsatna paltlang tura min tichaktu tur a ni tih kan hriat a ngai a ni a ti.

He ralna inkhawmah hian member kal kan ṭha a, Sorkar thuchhuak angin zaiho a ni lo thung. Bialtu Pastor in min rawn tawiawm a, huntawpah a tawngtai a ni.