Senior Upa Lalsangluaia Chenkual chanchin tawi

A pian leh murna leh chhungkaw lam :

Sr. Upa Lalsangluaia Chenkual kum 1933 khan a lo piang a. A pa hi Lal Vankhuma Chenkual niin a nu hi Chalrothangi a ni. Kolasib a piang a ni a, an unau hi 4 niin amah hi mipa awm chhun a ni. A pa hi Tumpui Lal niin amah hi Lal fapa a ni a, Mizo Lalte ban an nih thleng khan Tumpui-ah hian a Pa hi a lal a ni.

Kum 1961 April thla chawhma lamah Saihnuni nen inneiin fa 6 an nei a, chungte chu :

Lalnunhlima (L)

Hrangchungnunga

Zairemchhungi

Lalduhawmi

Lalmuanawma

Lalrammawii  te an ni.

UPC-a luh dan :

Ama sawi danin a hun hmasa lamah chuan Presbyterian Kohhran a ni a, heith lai hian Kohhran Pawl hrang hrangah hlimna a zawng a, a hmu zo lova, lenkhawmna nuam a ti em em thin. A nupui Pi Saihnuni Pu, Pu Lalkawlha'n Baptisma chang tura hrilhin a tirah chuan a zawm duh lova. A hnu deuhah Malaria veiin inchiu turin Damdawi Inah a kal thin a. Vawikhat inchiu tura a kal leh chu Damdawi In gate bula a kal lai takin "Baptisma i chang tur a ni" tihin a rawn deng a. Pathian Aw-ah ngaiin Chawlhni Chawhnu-ah Baptisma chang turin a inbuatsaih a, a nu bula a sawi  chu amah mai ni lovin A nu bakah Pu Thanglawra te nupa nen Baptisma an chang ta a ni. Hei hi ziaka kan hmuh dan chuan Dt. 9.5.1974 niin Rev Biakkunga kutah Baptisma hi a chang a ni.

Chanvo a chelhte :

Kolasib Venglaiah lawiin kum 1981-a Tumpui Preaching Point a nih khan an inkhawm hrang a, Tumpui-a UPC a din theihna tura hmalatute zinga mi niin kum 1982-a Kohhranpuia hlan a niha hruaitu hmasa ber ruat a nih khan Upa hmasa berte zingah a tel a, PYD President atan ruat niin Tumpui PYD President hmasa ber a ni nghe nghe. Local Churchboard Chairman, Secretary leh Treasurer te a lo ni tawh a, Pathian ram thawhlawm (Sawmapakhat) te pawh a kawl tawh thin. 1986 khan Missions Director a ni tawh bawk a. 2008 khan Upa chawl lova kum 26 ṭang chawimawina a dawng a, SS lamah hian Venglaia an lawi laiin nihna a chelh bawk nia hriat a ni. Kum 2010 khan taksa chak lohna avangin Sr. Upa ah hlan a ni.

Kohhran tana a pawimawhna thenkhatte :

A pa atang tawha Thlarau humhalhtu an ni a, Kohhranin Veng laili-a hmunhma kan neih theihna tura sultutu pawimawh tak a ni a, Kohhran kan baihvaia Inkhawmna tur kan neih loh lai pawha Kohhran lo tuamhlawmtu a ni.

UPC te hmanraw pawimawh em em mai KHUANG hi a duatin a uluk em em a, a savun lei dek zawnga dah a phal ngailo reng reng a, naupangin duhdah deuha an vuak pawhin a hau mai zel a ni.  Thlarau mi, thlarau duh, Lalpa avanga mittui tla mai thin a ni a, diklo nia a hriatah chuan hmaichhana mi hau mai thin a ni a, a hlu em em.

A thinchhiat a sim thei lo hi a mutan pakhat a ni ve a (hehe), mahse chu chu hun tam takah a tangkai leh thin si.

A hun hnuhnung lam :

Kum 2011 bawr vel atang khan a mit khaw hmuh hi a chiang lo a, a hnu lamah phei chuan khua a hmu thei ta lo a. An kawta a chetsualnaah insawh khawlovin mahnia kal thei lo; Wheel Chair hman ngaiin a khawsa ta a. chakloh viaua Wheel Chair-a a thut hnu pawhin hunpuiah chuan a theih danin a inkhawm hram hram thin, wheel chair a thu chungin a hunte pawh hman chang a nei a ni. BP sangte leh engengemaw insawiselna a nei a, kum 2021 Feb thla velah chuan Damdawi In panpui niin a ziaawm leh thin a. April thla bawr vel atangin Chaw pawh a ei tha peih ta meuh lo a. May ni 3, 2021 zan dar 10 velah buai zualin Phone Call hmanga Doctor rawn a ni a, Nurse-in amah vilin Thisenchawte pawh khai a ni a, hei hian a taksa a tina ta em em mai a, zing lam dar 4 velah chuan Damdawi In hruai tumin an inbuatsaih a, a thawhah zualin Dt. 4.5.2021 4:15AM-ah chuan thahnemngai taka rawng a bawlsak thin Lalpa hnenah min lo chawlh san ta a ni.

A vuina :

Covid-19 Second Wave avanga punkhawm tam theih a nih loh avangin Kohhran mipuite pawh a vuinaah hian kan tel theilo a. A fanu pakhat leh a fapa naupang ber pawh Home Quarantine lai a nih avangin Vuina inkhawmah a tel thei lo a ani. In lamah hian Rev. B. Vanlalruata, Bialtu Pastor-in vuiin Evan. Zoremmawia Hlondo-in Kohhran aiawhin a chanchin a sawi a, thlanmual lamah Evan Lalrelkima Renthleiin a thlahliam a ni.

A fapain sawi tura min chah :

Fate tana in leh lo pawh zuah hlei thei lovin Kohhran tan a pe a, Kohhran tan ui a nei ngai lo. An khawsak a harsat deuhlaia a faten an zilh deuh pawhin "A dang pawh la awm se la pek ka duh. Pek tur dang la awm se la pek asin ka duh" tiin a chhang a ni.

A damlaia a thusawi hnuhnung zinga mi :

"Kohhran hian thlarau lamah hun hmasa lam kan phalo nasa em em a, kan inhmaihna pawh hi a dal ta deuh emni tih tur a ni a, hei hi dinthar leh kan ngai a ni. Inngai taka rawng kan bawlho ang khan kan nun thar leh a ngai a ni,"  a ti.

Tumpui UPC te hian kan chan nasa em em a (kan chan ropui lova, mi ropui kan chan zawk a, kan chan nasa hle), a hmunruak hi a zau dawn hle mai.

Sr. Upa Lalsangluaia Chenkual, thlamuang takin chawl ang che. Nang zawng chawlhna nuamah i chawl ta si a.