UNAUPA LALAWMPUIA RAL

 UNAUPA LALAWMPUIA RAL

Dt. 26.12.2021

Kaihruaitu - Evan. Lalrelkima Renthlei, Secretary
Ralna thilpek - T. Upa VL Dika Pachuau, Treasurer
Chhungkaw aiawh - Sis. Tlangmawii (Unaupa Awma Nu)

Kohhranin inenkawlna Dan a siam angin tukin khan Dt. 18.12.2021-a boral Unaupa Lalawmpuia chu Kohhranin a chenna inah a ral a, member thahnem tak kalkhawm a ni.

Ralna Inkhawm hi Kohhran Secretary, Evan. Lalrelkima Renthleiin a kaihruai a, hun kan hman dan tur tlangpuii sawiin Pathian thu, 1 Korinth 15:35-38 a chhiar a, a tawngtai a. Hemi hnu hian ralna thilpek; T. Upa VL Dika Pachuau, Kohhran Treasurer-in a hlan a, Sis. Tlangmawiia M/o Unaupa Awma chuan a dawng a ni.

Chhungkaw aiawh thusawi ngaihthlak a ni a, Kohhran tana tih nei tamlo an ni chung pawha Kohhranin a hre reng leh a la tuamhlawm zel chu lawmawm a tih thu sawiin, thihna hi a tuartu tan a na em em thin a, Pathian nen lo chuan tawrh har tak a nih thu a sawi.
Kohhran Secretary hian thuchah a sawi a, khawvela kan awm chhung hian kan chhungkaw member zat hi kan insun tur chu a ni mai a, thlanmual hi midang chhungkaw tan a ni bik lova, keimahni tan pawh hian a ni tel a ni tiin kan hun lo thleng tur atana inbuatsaih lawk erawh tumah kan awm lo thung a ni a ti.

Kan lei taksa hian thih hnu piahlam ram a thlen theih loh avangin tihdanglam ni turin THIHNA a paltlang a ngai thin. Vanram ngaihna hla mittui nena kan sak fo lai hian chu hmun thleng tura THIHNA paltlang chak erawh kan awm miah lo a. Thlamuanna thute pawh hi sawi mah ila, thlamuantu tak tak chu Isua Krista chauh a ni a. Mihringah lungawina leh thlamuanna zawng lovin Isuaah zawk kan zawn a ngai a. Heng karah hian Thuthlung mi kan nih avanga kan danglamna tak kha kan lantir a tul em em a ni. Thawhlehnaa ropui taksaa kaihthawh tur kan nih hi kan inthlamuanna atan a tawk em em a ni. Kan hun tawp a lo thlen hunah pawh kan chhungten thlamuang taka min thlah theihna atan kan inbuatsaih a pawimawh em em a ni tiin kalkhawmte min fuih a ni.

Hun tawp kharna atan Lal Isua'n tawngtai dan min zirtir angin tawngtai rual a ni a, thingpui tui tak inho a ni bawk.

Unaupa Lalawmpui hi 1976 khan a lo piang a, an unauah a naupang ber niin Inpui nghaktu a ni a, a nu nen chauh an khawsa an ni. 2011 khan Cmaping-ah lutin a hlim em em a, Baptisma te a chang hial a, hun engemaw chen chu Biak In leh Kohhranah hun a hmang nghe nghe a. A inkhawm dawn pawhin tlai deuha kal duh miah lo, hma taka Biak In pan thin a ni. Amah hi mi chapo lo, rilru kawi pawh nei chuanglo, inngaitlawm tak mai a ni a, a duh zawng leh chak zawng pawh sawitha ngam lo a ni. 

December ni 16,2021 atang khan a taksa a chak lo deuh hlek a, a lenna hmunah kaih ang deuha awm chu an inah hruai haw a ni a. Doctor-te rawnin Thinlian leh pumthalo a ni tih hmuh chhuah a ni a. Thisen chaw khai turte leh damdawi ei turte a lo chawh a, zanah pawh thisen chaw hi khai nghal a ni a. December ni 18-ah chuan a chau leh zual a, a zun leh ek pawh a hre  mumal a nei lo deuh nia sawi a ni a. Amah pawh tal buai deuhin a chang chuan che mumal mang lovin a awm thin a. Chawhma lamah chuan tawng pah a la tawng peih a, chawhnu lamah erawh chuan a tawng pawh a mumal lo chho tan ta a. A mut that theih loh avangin muthilhna damdawite an pe a, hemi hnu lawk hian a mu thei dawna ngaiin ngaihtha takin chaw an ei san a. An va en leh chuan a awmdan a dik tak loh avangin kaihthawh an tum chu a harh thei ta lo a, thenawm khawvengte inpunin Damdawiin lamah in phurh a ni a. Dt. 18.12.2021 6:30pm khan a boral thu nemngheh a ni ta a ni.

A ruang hi lumen niin a tuk, Dt. 19.12.2021 (Chawlhni)-ah Rev. B. Vanlalruata, Bialtu Pastor-in a vui a, thlan lamah Evan. lalrelkima Renthlei, Bialtu Tirhkoh-in hun hnuhnung a hmang.