BUKVANNEI TIRHKOH THLAH

 BUKVANNEI TIRHKOH THLAH :
Dt. 23.3.2022 : Kolasib Venglai Bial

Bukvannei, Kolasib Venglai Biala Tirhkoh awm mek, Evan. R. Lalchhanchhuaha chu zanin khan Bukvannei Biak Inah thlah a ni.

Tirhkoh thlahna Inkhawm hi Bial Kohhranpui buatsaih a ni a, Upa Lalremliana Bial Secretary-in a kaihruai a. Nehemia 4:3 chhiarin Kohhran hote hi tluchhe leh mai tura din kan ni lova, tibuaitu tam tak kan neih karah pawh nghet taka dinga hnathawkin kan inhumhim tlat tur a ni a ti. Tirhkoh chhuak mai tur chu a ui thu sawiin a thlahna inkhawma tel zawng zawngte chungah lawmthu a sawi.

Rev. B. Vanlalruata, Bialtu Pastor-in thusawiin 2 Kor. 6:3-10  chhiar a, rawngbawlna hi a ril em em a, a hmasa berah Isua dah tur a ni a ti. Kan rawngbawlna hi miin an sawichhiata an dem lohna turin tluk phahna tur kan insiam tur a ni lo a ti bawk. Kolasib Venglai Bial hian rawngbawltu ṭhalo kan nei ngai lova, a chhan chu Bial mipuite ṭhat em vang a ni. Hei hi chhunzawm zel ang u tiin inkhawmte a sawm a. Bukvannei Kohhrante fakawm em emna chu kutdawh rilru pu lova pechhuak rilru kan pu hi a ni tiin vawiina rawngbawl tura kan inpekna tun hun atan chauh a ni lova, thlahte thlenga nghawng thei thil a ni a ti. Rawngbawlna hmun a sak poh leh Lalpa'n hnathawh a châk a ni tiin Isua Krista hi in chakna leh thiltihtheihna nise, nghah a ṭul pawhin nghah peih tur a ni tii Tirhkoh kal chhuak turte a fuih a ni.

Upa Lalhmangaiha Bial Missions Director-in thusawiin Zakari 4:6-a kan hmuh angin mihring chaknaa innghat lova Lalpa thlarauva innghat tur leh tlawm taka rawngbawl turin Tirhkoh kal chhuak turte a chah a ni. 

Sis. C. Lalremmawii, Bial LAD President-in thlahna thu sawiin Tirhkoh zahawm leh fakawm tak a nih thu sawiin an rawngbawl lehna turah Pathian malsawmna an dawn zel theihna turin duhsakna a hlan a ni.

Upa Samuel Lalruatfela, Bial SS Secretary-in thusawiin Bukvannei-a rawng a bawl chhungin hminghliauna nei lova a chhuak tur chu lawmawm a tih thu a sawi a. Rorelnaah pawh tawngkam fing taka sawi thin, Board pawhin a tangkaipui em em a ni tiin Pathian awmpuina hnuaia rawngbawl turin duhsakna a hlan.

Bial PYD aiawhin President, Evan. David Zothansanga Ralte-in hun a hmang a. Bial PYD te a thawhpui danah Tirhkoh chungah lawmthu a sawi a. Rawngbawlna hmachhawp awmah duhsakna a hlan a ni.

Bukvannei PP aiawhin Upa PC Malsawma, Secretary-in thu a sawi a. Tirhkoh thlahnaa tel zawng zawngte chungah lawmthu a sawi a. Bukvannei Kohhran an enkawlnaah vui leh vaina an neih loh thu sawiin an lawm thu a sawi. Venglai Bial ten Biak In leh SS Hall an sak sak avangin lawmthu a sawi a, Bial danga an awm tur chu lunglenthlak  tih thu a sawi.

Thilpek hlantute :
Bial Kohhranpui
Bial Missions
Bial SS
Bial LAD
Bial PYD
Bukvannei Kohhran
Bukvannei LAD
Bukvannei PYD
Mimal 

Evan. R. Lalchhanchhuaha, Bukvannei Tirhkoh-in thusawiin mi lawm zawng sawi thiamlo chhungkua leh rawngbawltu a nih loh thu sawiin beisei phak loh thilpek an dawng chu a lawmzia a sawi. A hmaa rawngbawlna inchhawp chu huphurhawm a tih thu sawiin Kolasib Venglai Biala Kohhran hote ṭawngṭai pui reng turin a ngen. Bial mipuiten an thawhpuinaah a lawm thu a sawi a, Kolasib Venglai Bial hi rawngbawltu hmangaih leh tuamhlawm ṭhin Bial a ni tiin helai Biala rawng a bawl ve thei chu inchhuanna tham a ni a ti a, Bial awhawm tak in ni a ti bawk. Tihsual leh tih dik loh an neihah ngaithiam turin Bial mipuite a ngen a ni.

Evan. R. Lalchhanchhuaha hian District tirhin kum 2019 Agust ni 21-ah Bukvannei-ah rawng a bawl ṭan a, hun laklawh tlazep zeuhah Bial-in thla 3 a ruai chhunzawm a, Bial Board sawmna/ngenna a pawmnaah Bial chuan lawmthu a sawi a ni. Hemi hnu hian District-in a ruai chhunzawm leh a. A hun hman tura ruahman hmang zovin Aizawl khawpui chhunga rawngbawl turin District-in ruahmanna a siam a, Urban Mission kalpui turah Kulikawnah rawng a bawl dawn a ni.

Bukvannei-a rawng a bawl chhung report :
Mi thar lakluh 30
Baptisma chang 25
Nauhlan thar 10
Thlarau Thianghlim dawng 20 chuang
Member awm mek - 165
Missions Department tih loh chu Department an ding kim a ni.

Thlahna Inkhawmah hian Bial Kohhranpui hruaitute bakah Bial Dept. hrang hrang hruaitute, Local hrang hranga hruaitute leh Bukvannei Kohhran hote an tel a, inkhawm banah thingpui inho a ni.

Inkhawm zat - 60