KOLASIB RENGTEKAWN BIAL THAR HAWN A NI TA :

N. Mizoram Dist. Conference leh District Board-in a rel bawhzuia District hruaituten ruahmanna an siam angin vawiin, Dt. 13.3.2022 chawhma dar 11 khan Kolasib Rengtekawn Bial thar chu hawn a ni.

Bial thar hawn inkhawm hi Rev. K. Lalduhsanga, Dist. Treasurer-in a kaihruai a, Sam 133 chhiarin "Unaute inngeih dial diala awm khawm hi keimahni chauh pawh ni lovin Bible pawhin ṭha a ti a ni" a ti.

Rev. Laltluanga, District Superintendent-in hun hmangin Philipi 3:16 leh Deuteronomy 6:4-5, Marka 12:28-29 a chhiar a. Kan Bial hawn tur hian kan thlen chin atanga hmasawn a ngai a ni a ti a. Tuna member zat hi in ni reng dawn lova, in la pung zel ang. Lalpa'n a pui dawn che u a ni tiin Bial thar turte a fuih a. Kohhranin mawhphurhna a pek angin Rengtekawn Bial thar chu Isua hmingin a hawng a, Bial thar hawn hriat rengna atana tar Thuziak tar tur chu Venglai leh Diakkawn Bial Secretary te kutah a hlan a ni.

Rev. C. Lalmuanpuia, Kolasib Diakkawn Bialtu Pastor-in thusawiin Bial thar hawn Programme an ngaihpawimawh thu sawiin Bial thar hawn hian thil hi a kal tluang purh vek kher lo a, mahse Kohhran rorelna khawlin a rel tawh chu zawm thiam hi Kohhran hote hian kan tih tur ani tih kan hriat reng a ngai a ni a ti a. Bial thar hawn hi Kohhran hian hma kan sawn pui zel a ni a ti bawk. Tun ṭum hi N. Mizoram District hnuaia Bial hawn hrim hrimah 62-na a nih thu a sawi lang a, Bial thara awm turte an ngaihawm tur thu sawiin hmasawnna thar nei zel turin duhsakna a hlan a ni.

Rev. B. Vanlalruata, Kolasib Venglai Bialtu Pastor-in thusawiin Isaia 66:8 thu a tarlang a. He Bial lo piang tur hi kan vei na em em a, Pathianin hetiang tur hian a lo ruat lawk hle niin ka hria a ti a. Rawngbawltu leh hruaitu ṭha tak tak awmsa kan neite hi kan vannei hle a ni tiin Bial thar lo awm hian chanchinṭha tidarh tel se a duh thu a sawi. Pathianin a thawpui ang che u, rawng lo bawl vak ula in hlim zel anga, zam lovin rawngbawl zel rawh u tiin Bial thar te a fuih.

Bial tharte hi thilpek chi hrang hrang pek niin Pastor thar awm huna pek tur engemawzat ruahman a ni bawk.

Bial thar hawn inkhawmah hian Sis. Lalengzuali, Sis. Lalhmingmawii leh Sis. Lalnuntluangi ten Pathian fakna hla an sa bawk.

Bial thar hawn inkhawm hi Rev. C. Lalmuanpuia, Diakkawn Bialtu Pastor-in malsawm ṭawngṭaiin a ṭîn.
Inkhawm banah Bial thar hawn lawmna ei leh in tui tak an lo buatsaih chu eia inho a ni.

Kolasib Rengtekawn Bial hi Venglai Bial, Diakkawn Bial leh Bilkhawthlir Bial chhunga Local, PP leh Missions Field te lachhuakin dahkhawm an ni a. Rengtekawn hi Hqrs. tur niin Bawktlang, Builum, Pangbalkawn, Saihapui K, Bukvannei, N. Thinglian leh S. Chhimluang te an awm dawn a ni. Heti hian N. Mizoram District-in tuna a enkawl mekah chuan Bial 31 a awm dawn ta a ni. 

Hun hman dan tura ruahman tarlang ve hrim hrim ang.
A hun : 13th March, 2022 (11:00AM)
A hmun : Rengtekawn Biak In
Chairman : Rev K.Lalduhsanga, Dist. Treasurer, NMD
Hlasak ho : Aw Lalpa i malsawmna hlu
Solo : Sis. Lalengzuali
Bial thar hawnna : Rev Laltluanga, Dist. Superintendent, NMD
Solo : Lalhmingmawiii
Thusawi tawi :
1. Rev. C. Lalmuanpuia, Kolasib Diakkawn
2. Rev. B. Vanlalruata, Kolasib Venglai
Thilpek hlanna : A duh apiang tan
Hlasak ho : Ngai rawh Lalpa’n a Gerep huanah
Hun tawp ṭawngṭai : Rev C. Lalmuanpuia, Diakkawn Bialtu Pastor